Shillong, Lber 07: U myntri rangbah ka jylla u Dr Mukul Sangma haba jubab hapoh ka iing dorbar mynta ka sngi iaka Zero Hour kaba la wan rah da u Nahim D Shira halor ka jingshah siat jong ki lai ngut ki riew paidbah ha ki pulit ha North Garo Hills District, u myntri rangbah u la pdiang ia ka jingdawa ban thung da ka Judicial Inquiry ban tohkit ia kane ka jingjia khnang ban lap ia ki jingshisha baroh.
U myntri rangbah u la ong ba na ka liang jong ka sorkar kan ialeh katba shah ka lynti ban iarap ia ki lai ngut ki briew kiba la mynsaw ha kane ka jingjia ia kaba la kit ia ki sha International Hospital ban phah sumar. Ha ka juh ka por na ka liang jong u myntri rangbah ka jylla u kyntu ia ki paidbah ban long kiba jai jai, khnang ban wanrah ia ka jingshong suk ha kane ka jaka.
U myntri kam poh ing jong ka jylla u Bah HDR Lyngdoh haba wanrah ia ka kren ha poh ka iing dorbar ia kane ka jingjia kaba la jia mynnin ka miet ha Resubelpara jong ka North Garo Hills ha kaba lai ngut ki briew kila mynshaw ha ka jingsiat jong ki pulit, kine kiba la mynsaw la tip kyrteng kum u Milseng Sangma 35 snem, u Tubal Sangma 29 snem bad u Janrak Sangma 27.
Haba batai ba balei kane ka jingjia ka jia ha ka meit sngi nynkong, la ong ba ki pulit kila ioh ia ka khubor ba u wei na ki lehnoh u ba ki pulit kila thwet u iaid lyngba ka surok Resu-Khaldang bad ki pulit kila pynlong ia ka jingtalasi ia ki kali kiba iaid naduh ka por 8 baje mynmiet bad ha ka por kumba 10.30 baje ei ei ka wan kane ka kali Bolero Picup bad haba ki pynsangeh ka phet na kti jong ki pulit.
Haba iohi ia kane ka jingleh jong ki ki pulit la siat ia kane ka kali bad ha kane ka sait kitei ki lai ngut ki briew kila mynsaw bad ha dien kane ka jingjia ki paidbah kila ia mih bad kila thang san tylli ki kali, kawei ka Gypsy jong ki pulit, kawei ka Jeep Thaar, ka Kali pynlip ding, kawei ka Mini Truck bad ka Bike kine ki dei jong ka sorkar, ha kane ka jingjia kawei ka kali Maruti Car bad ka Bike ba dei jong ki riew shimet ruh la shah thang lang. Ka police station ruh kala shah kyndang ia ki paidbah.
Na ka liang jong u Nahim D Shira, MLA haba wanrah ia kane ka mat jingiakren hapoh ka iing dorbar u la dawa ba dei ban siew ia kaba lut ksan bad ban thung ia ka kynhun tohkit, u James K Sangma ruh u la dawa ba ka sorkar ka dei ban thung ia ka kynhun tohkit bad ban siew bai lut ksan sha kiba ha iing ha sem jong kine kiba shah siat ha ki pulit.
U myntri rangbah ba rim ka jylla u SC Marak u ba dei ruh u MLA jong kane ka jaka u la ong ba, ka sorkar ka dei ban thung da ka Judicial Inquiry ban phah tohkit bad ha ka juh ka por ban siew bailut ksan ha kaba ia dei bad kane ka jingjia ha kaba la pdiang da ka sorkar, ha ka jingkren jong u myntri rangbah ka jylla u Dr Mukul Sangma.
