Dawa ka CoRP na ka NHAI ba kan maramot noh ia ka surok four-laning kiba la sniew

Shillong, K’Lyngkot 23:Ka Confederation of Ri Bhoi People (CoRP) ka sngewkhia jur ia ka jingleh sting ka kompani ban pynbha ia ka surok bah four-laning kaba la sniew ha ki katto katne ki jaka bad ka long ka jingma ia ki nongleit nongwan khamtam kane ka surok ka long ka kum ka jaka rung bad mih ha northeast ha kaba da ki phewhajar ki  kali ki iaid man ka sngi.

Ka seng ka dap da ka jinglyngngoh ba ka kompani ka shu lum pisa na khyrdop ha 20 Mer, katba ka jingkieng kaba la sniew ha shnong Umsaw Nongkharai bad kiwei jaka ba sniew ka sueok kam lah shna la bun bun bnai, ka la shu khangsah shilliang ka surok ha katei ka jaka bad ki kali ki hap ban iaid na ka liang ka bym dei kaba lah ban wanrah ia ka jingjia aksident ha kano kano ka por.

Ka seng ka buh jingkylli, hato ka katei ka kompani ka ap haduh ban da jia ki jingtakhuh kali ha katei jaka kan sa pynbha ne ka mut ban leh kumno, namar haduh mynta kam pat don dak eiei ban pynbha ia katei jaka ba sniew bad ka shu pynbha ne pynkhuid pynban ia kiwei ki bym da donkam eh. Ym tang katta ki don ruh kiwei jaka ba la khoh ka rong kum ha Umsning By-pas, Sumer bad kiwei kaba long kumba pynap shrip ia ki nongleit nongwan namar kam la pynbha la bun bun bnai.

Kumta ka seng CoRP ka kyntu ia ki bor ba dei peit la ka dei ka kompani ne ka National Highway Authority of India (NHAI) ban shna noh mardor ia ki jaka ba sniew ban lait na kino kino ki jingjia ba sngewsih bad ki paidbah kin shngain ka leit ka wan.

Ha kajuh ka por ka seng ka kyntu ia ka Deputy Commissioner, Ri Bhoi district ban tuklar lem ia kane ka jingleh mynthi katei ka kompani ne ki bor ba dei na bynta ka jingbit jingbiang ki paidbah nongleit nongwan. Kane ka long katkum ka kyrwoh khubor ba la phah da u bah Roland Lyngdoh, President ka CoRP Nongpoh Circle.

 

 

What Next?

Recent Articles

Leave a Reply

Submit Comment

*