Shillong, Nohprah 03: U myntri rangbah ka jylla u Dr Mukul Sangma ha ia shim bynta ha ka jingrakhe pyndon burom ia ki briew kiba don ka jingduna ha ki dkhot met mynta ka sngi ha Tura, u la pynpaw ia ka jingsngew diaw ka jong u ban iohi ba ka don ka jingkiew ha ka riewlum ha kane ka jingdukan ki dkhot met.
Na ka liang jong u myntri rangbah u la pynsngew ba la don kam ban wad bniah katkum ka stad saian jong kane ka juk ban mynta ban lap ia ka daw tynrai balei ka long kumne. Ki doctor ki dei ban wad bniah ban lah ia ka daw bad ban wad kilat ki lynti kumno ban weng ia kane ka jingeh.
Ha ka juh ka por u la kyntu ia ki briew ba kin ai ka jinghikai kaba kyrpang ia kine ki briew kiba don ka jingduna ha ki dkhot met ba kin lah ban pyndon kam ia ki sap ki phong namar ba ki lah ban ieng hala ki jong ki kjat.
Ha kane ka sngi la ai jingiarap ruh ia ki 191 ngut ki briew kiba don ka jingduna ha ki dkhot met ha kane ka jingialang, ka jingiarap kaba la ai da ki tiar katkum ka jingdon kam ka jong ki kala kot sha ka 16 lak tyngka ia kaba la noh syniang da ka Artificial Limbs Manufacturing Corporation of India (ALIMCO), Union Ministry of Social Justice bad Empowerment hapoh jkong ka ADIP skhim. Ha kane ka sngi la don ruh kiwei kiwei ki heh sorkar ban ia skhai lang ia kane ka sngi.
