Shillong, Nailar 04:
Ka Working Group –III, Meghalaya State Planning Board, hapoh ka jingpyniaid u Bah John F Kharshiing, Co-Chairman, Meghalaya State Planning Board, Govt of Meghalaya, la pynlong ia ka jingia kynduh lang ki 25 tylli ki Village Employment Council(VEC), ka Smit GSC, Umphrup GSC, Nongkrem GSC, Umphyrnai Gram Sevak Circle, hapoh ka Mawryngkneng C&RD Block, East Khasi Hills District, hapoh ka AEC Building Wahiing Syiem, Smit, Khyrim Syiemship mynta ka sngi.
Ha katei ka jingialang la don lang ki officer na ka Mawryngkneng C&RD Block, bad u Bah KM Syiem, Sordar Smit, ha kaba la ia don lang ki Chairman, Secretary, Treasurer, ki nongmihkhmat na ka liang ki longkmie, ki Rangbah Shnong bad kiwei kiwei, bad ha kaba la ioh ka jing pyni da ka power point presentation na ki officer ka Mawryngkneng Block halor ki jingtreikam kiba pher bapher hapoh da ki VEC hapoh ka Mawryngkneng C&RD Block. La ioh lyngba katei ka jingpyni dur ia ka jingtrei “Organic Kitchen Garden” ha ka Skul ha Mawryngkneng, ki jaka sait jain kiba kyrpang bad kiwei kiwei. La ioh jingkren ruh na ka liang u Doctor ka tnad Animal Husbandry & Vetinary,uba la ong ba ka la long ka jingmyntoi ia ki paidbah namar ki VEC ki la ioh ia ka jingmyntoi lyngba ka MGNREGS ha kaba la ioh pyntrei kiba bun ki jait jingtrei.
Na ka liang u Bah John F Kharshiing, Co-Chairman, MSPB, u la ong ba kane ka jingiakynduh ka long kawei na ki kam kiba ka Working Group –III ka la buddien bad kiba bun ki C&RD Block bad kiba bun ki VEC hapoh ka jylla mynta la bun snem ban thaw lad ban plie lad ia ki nongpyniaid VEC ban kin ioh ia ka Fund, u la pynpaw ba mynta ka Sorkar Jylla ka la mynjur ban shah ia ki VEC ba kin khate 1% (shi percent) na ka dor material kum shibynta ban pynmih ia ka fund na ka bynta ki VEC, kiba bun ha kaba ai khublei ia ka Sorkar Jylla halor katei ka jingbhah 1% ia ka Fund VEC ki la kyrpad ban pynkiew shuh shuh khnang ba kan lah ban thaw lad ba ki VEC kin ioh ka Fund kaba kham kylluid. Ki VEC ki la kyrpad ia u Co-Chairman ban kyntu ia ki bor sorkar ban kin thaw lad ban pyllait ia ka pisa VEC kham kloi.
Shuh shuh halor ka bai nong, u Bah John F Kharshiing, Co-Chairman, MSPB, u la mynjur bad ki dkhot ka jingialang ba la donkam ban pynkiew ia ka bai nong ba kan ia hap kyrdan bad ka jingkiewdor ka mar bam mardih. Ki don ki VEC kiba la kyrpad ban thaw ki lad ban pyndon kam shibynta jong ka 100 sngi ha ki kam rep bad ka kam ri jingri. Katkum ka jingpan jingshai ki VEC la pynpaw ba kam don kano kano ka dondon kaba shah ban pynbha (repair) ia ki jingtrei ba rim hynrei ki lah tang ban buh noh kum ki jingtrei kiba thymmai.
Baroh ki VEC, kiba la poi na ka Mawryngkneng C&RD Block, ki la mynjur ba ka MGNREG Scheme ka dang dei ban bteng namar kiba bun ki shnong ki long kiba dang duna ha kiba bun ki liang. La don ruh ka jingpynsngew ba ki katto katne ki VEC ba ka Social Audit ka dei ban kam long kaba long thikna kum shibynta ban iarap ia ki VEC ba kin nang ioh jingshai. Halor ka jingkylli u Bah John F Kharshiing, jan baroh ki VEC ki la pynpaw ba jan baroh ki job card holder ki la don la ka jong ka Bank Account.
Ha katei ka jingialang u Co-Chairman, MSPB, u la pyni ruh ia ki nongkitkam VEC ia ka program kaba dang iaid mynta kaba iadei bad kumno ban shna pynbha ia ka dpei iing ha kaba katei ka jingstad thymmai ka long ka lad kaba pynduna ia ka tdem bad ka long kaba pyndonkam duna ia ki dieng thang. U la pyntip ba ia katei ka project lyngba ka SPIKAP, UNDP, SGP, la pyntrei ha ki jaka ki shnong kiba sawdon ki law kyntang. Kumta u la kyntu ia ki VEC ba kin shim khia ban pyntip ha la ki shnong lada don kiba kwah kin pyntip mar mar ia katei ka jingdonkam ha kaba ki trai iing kin hap pynbiang tang u shiap saw tin bad u mawria lai tin bad kiwei kiwei ki jingdonkam la ioh lyngba katei ka project.
U Bah John F Kharshiing, Co-Chairman, MSPB u la kyrpad jur ia ki VEC ban shim khia bad u la buh ha ki ka thong ban pynlong ka shnong kaba jop ha ka kam ban khang ia ka jingleit shabar pathar sha lum sha wah bad ban ioh ia ka khusnam “Open Defecation Free Village” . Ki VEC ki la kyrpad ia u Co-Chairman, MSPB, ban pynlong biang ia katei ka jingiakynduh kum shibynta ban ai jingshai halor ki kyndon MGNREGS bapher bapher. Ha kaba pynkut u Co-Chairman, u la pynpaw ba baroh ki jingai jingmut yn sap hah sha ka Sorkar Jylla ba kin leh ia kaba donkam. U la ong ba kane ka rukom ia kynduh kan sa nang iai long ha man ki Block kum shibynta ban iohsngew ia ka jing ai jingmut ki VEC halor ki kam pynroi hapoh ki shnong. Kiwei kiwei kiba la kren ha katei ka jingialang Sorkar ki long ki Officer na Block bad u Bah KM Syiem, Sordar Smit, uba la ai bun ki jingai jingmut bad ia kaba u Co-Chairman, MSPB u la mynjur ban rah hakhmat ki bor Sorkar Jylla.
