Shillong, Naitung 21: Ka cabinet mynta ka sngi kala pdiang ia ka ‘PWD Road repair and maintenance policy’. Haba ka sorkar ka shna ia ki surok, hynrei ban maramot ia ki pat ka long ka jingeh kaba khraw ia ka sorkar jylla, dei na kane ka daw ba ka sorkar kala wan rah ia kane ka policy khnang ban lah ban peit bniah ha kaba ia dei bad ka jingmaramot ia ki surok ha ka jylla.
Haba kren ha ki lad pathai khubor ha dien ba la wai ka jingialang jong ka cabinet na ka liang jong u myntri rangbah U Dr Mukul Sangma u la ba ka jingthmu jong kane ka policy ka long ban peit ia ka rukom maramot ia ki surok, kum ka jingmaramot kaba katkum ka por, ka jingmaramot kaba don kam kyrkieyh bad ka jingmaramot kaba hap ban leh. Da ka jingdon jong kane ka policy kan kdew lynti ia ka tnad PWD kumno ban iaid sha khmat ha kaba maramot ia ki surok ha ka jylla.
Na ka liang jong u myntri rangbah u la ong ba duna ki kontraktor kiban ia shim bynta ha ki jingtrei jong ka sorkar ha ka jylla, ki kontraktor ki bun hynrei kim lah ban trei ia ki kam katkum ki kyndon kiba la buh, dei na kane ka daw ba u juh ong ia ki kontraktor ba ki hap ban pynbit ia lade katkum ka juk ba mynta. Da ka jingdon kane ka policy kan iarap ban kyntiew ia ki kontraktor.
La ong ba ki don bun ki jingtrei tang ka daw ba duna ki kontraktor ka sorkar ka hap ban khot tender biang ia ki namar bun na ki kontraktor kim lah ban trei ia ki kam namar ba ki la bun ki jingtrei ba ki ioh bad ha ka juh ka por ki bun ki kontraktor kiba kim lah ban pynbiang katkum ki jingdon kam dei na kane ka daw ba ki sa ong bym ioh kam.
Haba ia dei bad ka jingshna ia ki surok, ka dei kaba shisha ba ka Indian Road Congress kala buh ia ki rule kiba long kyllum ia baroh kawei ka Ri, hynrei haba ia dei bad kine ki rule ka jylla kala kham iaid kham sha khmat ha kaba ka sorkar la leh katkum ka jingdawa jong ka jaka namar ka jylla Meghalaya ka dei ka jylla kaba jur slap tam ha ka pyrthei.
