Shillong, Nohprah 10: Ha kane ka jingiakynduh bad u lat ka jylla na ka liang jong u nongialam ka liang pyrshah u Dr Mukul Sangma u la ia kren ruh halor ka jingbym pat siew ia ka tulop jong ki nongtrei ka Garo Hills Autonomous District Council naduh u bnai Jymmang 2018.
Ka kynhun ki nongtrei ka GHADC mynta ki don ha Shillong kila dep ban ai ruh ia ka jingthoh jong ki sha u Lat jong ka jylla bad kila phah ruh sha u ia ka jingthoh sha u nongialam ka liang bad ha kane ka jingthoh kila kdew ruh ia ki jingkynnoh bamsap ha kaba ia ka pisa kaba la ai da ka sorkar pdeng na ka bynta ki kam pynroi ha ki jaka jong ki riewlum kiba dang sah dien la kynnoh bala pyndon kam bakla bad ia kane ka pynsngew sha u Lat ka jylla.
Ban pynthikna ba ka ain kan leh ia la ka kam, ban tohkit bad ban pynshitom ia kito kiba la don kti ha kane ka jingkynnoh bamsap, ha kane ka jingiakynduh ruh ia ka jingpynslem jong ka sorkar khlem daw ban pynlong ia ka ilekshon sha ka iing dorbar jong ka GHADC kaba la dei ban long ha u bnai Risaw mynta u snem.
Kumba ka long mynta la pyntrei kam ia ka para 16 (2) jong ka Sixth Schedule bad ia ka ilekshon la pynslem, ha kane ka jingiakynduh la ong ia u Lat ka jylla ba km don daw ban pynslem ia kane ka ilekshon bad ia ka ilekshon dei ban pynlong ha ka por kaba biang, kumta ka jingpynkhreh ia ka ilekshon la dei ban sdang.
U Dr Mukul u la ong ba kynmaw ha ka por jinglong myntri rangbah ka jong u ruh la pynjlan ia ka iing dorbar jong ka GHADC, hynrei ka don ka daw bad kata ka dei na ka jingiasoi suk hapdeng ka sorkar pdeng ka seng ANVC bad ka sorkar jylla bad ha kane ka jingiateh kular kala don ka jingia mynjur ban pynbun ia ki MDC bad ban ai shuh ia ka bor sha ka District Council.
Haba ia dei bad kane ka sorkar kala pynbna ia ka ilekshon ka sorkar ha kato ka pork ala ioh pdiang ia ka shithi na ka tnad kam poh iing ka sorkar pdeng kaba la pyntip sha ka sorkar jylla kaba ong namar ba ka don kane ka jingiateh kular bad ban pyntrei kam ia kine ki jingiatehkular la don kam ban pynkylla ia ki katto katne ki bynta jong ka Sixth Schedule.
Haba ia dei bad kane ka iing dorbar Parliament kan dang shong bad ban pdiang ia kine ki jingdawa kumta ka long ka bit ia ka sorkar ban pynsangeh ia ka jingpynlong ia ka ilekshon sha ka iing dorbar jong ka GHADC bad kane ka shithi ka don bad ka sorkar, kam dei ba ka leh ka sorkar jylla marwei hynrei dei halor katei ka nongrim.
Haba ia dei bad kane ka jingpynsangeh ia ka ilekshon kam don daw, ka daw kaba la ai kaba yn nym lah ban pdiang namar ka daw kaba la ai dei tang na ka daw jong ka jingdon kane ka khlam COVID-19 , kumba ka long mynta kan nym don daw shuh ban dang pynslem ban pynlong ia ka ilekshon ha GHADC.
