Shillong, Kyllalyngkot 19: Ia ka lympung kaba 14th ki khynnah ka Seng Khasi Sein Raij (SKSR) kaba ar sngi lynter la plie mynta ka sngi ha Madan Weiking Shillong ha kaba da ki spah ngut ki khynnah na kylleng ka Bri-U Hynniretrep kila poi sha kane ka Lympung mynta u snem 2019.
Haba kren ha kane ka lympung kaba khatdsaw jong ka Seng Khasi Sein Raij u Bah Mohendro Rapsang MLA jong ka 18-Shillong West, u la kyntu ia kine ki khynnah kiba la poi sha kane ka lympung ba ki dei ban don ia ka thong ha ka jingim, namar ka lawei jong ka Ri bad ka jaidbynriew ka shong ha ka kti jong jong ki.
Kane ka lympung kaba 14th jong ki khynnah jong ka SKSR ka long ruh kum shibynta ban rakhe ia ka jingdap 50 snem jong ka seng khynnah seng kmie, Mawkhar ia kaba la seng ia ka ha u snem 1969 bad ia ka lympung kaba nyngkong jong ki khynnah ruh la pynlong ha kane ka jaka.
U Bah Mohendro u la kyntu ia ki khynnah ba ki dei ban sarong la ka jong ka thymmei, u la ong ba ki dei ban long kiba don burom don akor, burom iala ka kmie bad u kpa bad ia kiba la heh la san.
Ha ka jingkren u Bah Donkupar Dkhar president seng khasi seng kmie, u la ong ba ia ka Seng khynnah la sdang ha ka 23rd Jymmang 1969 ha Mawkhar bad mynta kala don ia ki shnat trei kam haduh 20 tylli bad san tylli ki jaka hikai, u la kyntu ia kane ka kynhun ban lum ban lang ia ki kot jingrwai bad ki jinghikai halor ka niam tynrai bad u la kyntu ia ki kmie ki kpa ban phah ia ki khun ki kti sha ki jinghikai.
Ia ka jingialang plie ia kane ka lympung kaba 14th da u bah PD Sawkmie secretary bad ha kane ka sngi la don lang ruh ki nongkit kam jong ka seng kmie seng khasi. Ha kane ka sngi la pynlait paidbah ruh da u MLA u Bah Mohendro Rapsang ia ka kot sah kynmaw ia ka jingdap 50 snem jong ka Seng Khynnah seng Kmie bad ia ka thup jingrwai lyngba ka CB.
