S
hillong, Lber 20: Ka seng KSU mynta ka sngi kala sdang ia ka jingrakhe jong ka jingdap 40 snem jong ka seng mynta ka sngi da kaba iaid paidbah na ophis jong ka seng sha State Central Library ha kaba la pynlong ia ka jingialang paidbah ban plie pyrda ia kane ka jingsdang jong ka jingrakhe kaba shisnem lynter.
Ha ka jingkren plie ia ka jingialang da u president ka seng u Samla Lambokstatwell marngar, u la ong ba ka jylla kala iaid mynta 46 snem, hynrei ka jylla kam pat don ia u pud u sam u ba biang, ka jylla ka dang dei ka jylla kaba khlem pud khlem sam.
U tei unongalam jong ka seng KSU, u la ong ba kane kan long ka khubor sha kane ka sorkar thymmai ba kan ioh sngew ia kane bad lada kam leh ei ei na ka liang jong ka seng kam ban se ban leh ei ei haba ia dei bad u pud u sam.
Haba ia dei bad ki kam kiba ka KSU kala leh, u ne u nongialam u la ong ba ka seng kam kwah ban pud turoi, hynrei ai ki kam kin kren kham jam ia kaei kaba ka seng kala leh na ka bynta ban iaida ia ka jaidbynriew bad ai ki paidbah kin bishar ia kaei kaba ki la leh.
Ha kine ki 40 snem kiba la leit ka KSU haba ka shim ia kino kino ka phang ha ka jingialeh ki wan ruh ki jingtynjuh bad ia kane u la sngewthuh wat tang ha kane ka shisnem tam ba u la shimti ia ka kam, u nongialam jong ka seng u ngeit ba ki nongialam jong ka seng kiba la leit noh ruh ki ngat ha kane ka juh ka jingeh.
Haba ia dei bad ka jingdawa ia ka ILP ka sorkar kala kyrngah ban ai bad kala warah da ka Comprehensive Mechanism, bn khang lad ia ka jingwanrung ki briew kiba na bar ka seng kan dang iai bud dien ia kane, hynrei ha kaba ia dei bad ka jingdawa ia ka ILP kam pat duh na ka seng.
Na ka liang jong ka seng KSU ka pynpaw ia ka jingsngewnguh kaba kyrpang ia ki kmie ki kpa kiba la ai mynsiem ia la ki jong ki khunwat ha pdeng ki jingeh kaba ki mat. Na ka liang jong ka KSU ka kyntu ia ka jaid bynriew ba kin klet noh ia ka jingiasngewpher niam, hynrei dei ban kynmaw ba ka jaid bynriew ka dei tang kawei.
Ia ka lama ban rekhe ia kane ka jingdap 40 snem jong ka seng la pynher da u President ka seng u samla Lambokstarwell Marngar ,ha kane ka sngi la pynlait paidbah ruh ia ka muhor jong ka seng ha kaba ki paidbah ki lah ban phah ia ki shithi ha kylleng jong ka Ri India.
Ha kane ka sngi ki nongialam barim jong ka seng kila ia don lang, kynthup ia u Michael Syiem, bah Paul Lyngdoh, Bah Samuel Jyrwa , bah Daniel khyriem bad bun kiwei ki nongialam, kyntup ia u bah Adelbert Nongrum bah Hamlerson Dohlieng bad u bah Pyniaid Syiem. Ha kane ka sngi palat hajar ngut ki dkhot jong ka seng KSU kila ia poi lang ban sakhi ia kane ka sngi sah kynmaw.
