Shillong, Iaiong 21: Ki nongalam jong ka seng UDP kin ia kynduh ha ka sngi nyngkong jong kane ka taiew ban wan ban ia kren halor ka jingleh jong ki saw ngut ki MDC hapoh jong ka KHADC ha dien ba ka party kala shim ia ka rai ban weng noh ia ka jingkyrshan na ka PDF kaba la ialam da u Bah PN Syiem.
U General Secretary jong ka seng u Dr Jemino Mawthoh haba kren ha u SP News Agency mynta ka miet u la ong ba kum ki nongialam jong ka sengki hap ban ia kynduh ban ia kren ia kaei kaba la leh da ki MDC jong ka party bad la buh ba kin ia kynduh ha ka sngi nyngkong jong ka taiew ban wan.
Haba la kylli hato ka party kan khot hajir ne em ia kine ki MDC saw ngut, u Bah Teinwell Dkhar, Bah Equator Nongrang , Bah Albinus Lyngdoh bad ia u Bah Donkupar Sumer, u nongialam ka UDP u la ong ba kum ka party kan sa khot ia ki ba ki dei ban wan pynshai hapoh ka party bad ha dien ba ki la ioh ia ka jingpynshai kin sa peit ia kaba dei ban leh.
Na ka liang jong u Bah Teinwell Dkhar nongialam ka PP hapoh jong ka KHADC na ka party UDP u la kren shai ba kin phah da ka jingthoh sha ka party ba ka party ka hap ban pyrkhat biang ia ka rai jong ka CEC ha kaba ia dei bad ka jingweng noh ia ka jingkyrshan na ka EC khleh Khawlang hapoh KHADC ha ka kynhun PDF kaba la ialam da u bah PN Syiem kum u CEM.
