Ha ki saw snem ki khynnah kiba pep skul ha Meghalaya ki long haduh 97089 ngut

Shillong, Lber 20: Ka myntri ba dei peit ia ki skul rit ha kane ka jylla ka Debora C Marak , haba jubab ia ka jingkylli jong ka Dikkanchi D. Shira na ka liang synshar la iathuh ba ka jingpep skul jong ki khynnah ha kine ki saw snem kiba la leit noh kala kynjoh sha ka 97089 ngut.

Ka jingpep skul ka long ba ha u snem 2013-2014, ki long 33557 ngut, ha u snem 2014-2015 ki long 31276 ngut, ha u snem 2015-2016 ki long 14957 ngut bad ha u snem 2016-2017 ki long 17299 ngut. Ban pynshlur ia ki khynnah ban wan sha skul ka sorkar kala shim bun ki lad ki lynti la ong ka mynta.

Haba la kylli kiei kidaw kaba la pynlong ia ki khynnah ba kin pep skul, la ong ba ka daw kaba nyngkong ka dei ka jinghiar ha ka ioh ka kot, ka jingphail bunsien, ka jinglong jong ki nonghikai, ka jingbym biang ki  iing skul bad ka jingkynriah jaka jong ki na kawei ka jaka sha kawei pat.

Haba jubab ia ka jingkylli bynrap jong u Saleng Sangma halor ka jingpep skul jong ki nonghikai, ka myntri kala ong ba lada ka sorkar ka ioh ia ka jingujor ia kum kita ki nonghikai ka sorkar kan pynshitom, ka myntri kala ong ba hooid ki don ki jaka kaba ki nonghikai kim nud ban leit hikai na ka daw jong ka jingbym shngian ia ki nonghikai.

Kiwei kiba dkhot jong ka iing dorbar kiba la ia shim bynta ha kane jingkylli ki long u Nahim D Shira, Bah Embhah Syiemlieh, Paul Lyngdoh.Ha ka jingkren jong u Bah Paul Lyngdoh u la ong ba kane ka jingpep skul jong ki khynnah kala bun shisha.

Na ka liang jong ka myntri kala ong ba ka sorkar kala wad ia kilad ki lynti baroh kumno ban khring ia ki khynnah ba kin wan sha ki skul da kaba ai ja sngi ia ki, ki Uniphom bad bun kiwei kiwei ki kam ban khriangia ki khynnah ba kin wan sha skul.

What Next?

Recent Articles

Leave a Reply

Submit Comment
*