Shillong, Lber 29: Mynta ka sngi la tep don burom ia ka Sister Julia N Mawjaw 91 snem ha Krishnanagar, Nadia District, jong ka jylla West Bengal. Ka jingkhlad jong ka Sister ka dei mynin ka sngi saitjain 28/03/2020.
Ha kane ka jingjia kaba sngewsih, kiba ha iing ha sem kim shym la ioh lat ban leit sha kane ka jingleit ontep ban burom khatduh namar kane ka jingpakhang ban iada na u khniang jongpang COVID-19.
La kha ia ka Sister Julia ha u snem 1928 kala pyniasoh ia lade sha ka kynhun riew niam “Sisters of Mary Immaculate” ha ka u snem 1950 bad ka dei na ka kynhun kaba nyngkong ban rung sha kane ka kynhun ki riewniam.
Ka Sister Julia ka dei ka hynmen jong u Bah Martin N Majaw bam kwai ha dwar u blei myntri pla pisa jong ka sorkar Meghalaya, ka para kong Josephine Majaw ka sah ha Malki bad u para shynrang u wei u sah sha Ri Canada ha America.
Ka Sister Julia kala pyndep ia ka kyrdan pule PhD ha ka subject Psychology na ka skul bah Jawaharlal Nehru University New Delhi ha u snem 1982. Dei ha u snem 1986 kala shah jied ban long kum ka State coordinator ban pyntrei mon sngewbha ia ka skhim biogas bad ha u snem 1995 la pynkup burom da ka khusnam Meghalaya State Mahatma Gandhi Award.
Ha kane ka jingjia kaba sngewsih, ka Kong Josephine Majaw kaba sah ha Malki, ki khun kiba dei na u bah Martin kiba kyntup ia u Bah Robert Kharshiing, bah John F Kharshiing, Bah F Kharshiing, Bah M Kharshiing bad ka Kong Agnes Kharshiing kim shym la lah ban poi sha kane ka jingleit on tep na ka daw jong kane ka jingpakhang ban leit ban wan.
Namar kane ka jingphang ban ia khun pyrshah ia u khniang jingpang COVID-19 na ka liang jong ka sorkar West Bengal badki bor ba dei peit ia ka District Administration la shah tang hynniew ngut ki sister ba kin ia don lang ha kane ka jingleit ontep don burom ia ka Sister Julia mynta ka sngi.
