Shillong, Iaiong 02: U Myntri Rangbah ka jylla u Conrad K Sangma mynta ka sngi u la leit ban jurip ia ka Ganol Hydel Power Project kaba don ha West Garo Hills District bad ia ka bynta kaba nyngkong yn sa lah ban pyntrei kam ban pynmih bording ha bnai Risaw mynta u snem.
U Myntri Rangbah ha kane ka jingleit jurip mynta ka sngi ia ka tei ka jaka pynmih bording la ong ba kane ka jaka pynmih bording ka don ha ki lai tylli ki bynta, ia ka Statge-1 yn pyntrei kam ha u bnai Risaw bad ia ki ar tylli kiwei pat kin sa pyndep ha ki bnai ban dang wan.
Ban pynsted ia kane ka jingtrei na ka liang jong u mytnri rangbah ka jylla mynta ka sngi u la bthah ia baroh ki ia don bynta ha kane ka jingtei ia kane ka jaka pynmih bording ban peit ba ka jingpynpoi ia ki mar ki mata ban trei ia kane ka kam ka dei ban biang bad ki jingtrei kin iaid beit.
U Myntri rangbah u la ong ba u sngewhun ban iohi ba ka jingtrei ia kane ka jaka pynmih bording kala iaid beit bad kwah ban ioh ban pyndep ha ka por kaba biang na ka bynta ka jingmyntoi jong ki paidbah ka jylla bad khamtam ia ki paidbah ka Garo Hills ba kin ioh ia ka bording na kane ka jaka.
