Haba jubab ia ka jingkren u Lat ha iing Dorbar, nga ngeit ka kam ka kren jam ban ia ka ktien:Conrad

Shillong, Iaiong 06: U mytnri rangbah ka jylla u Conrad K Sangma, ha shuwa ban jubab ia ka jingiatai halor ka jingkren jong Lat ka jylla hapoh ka iing dorbar u la ong ba “ Nga ngeit ka kam ka kren kham jam ban ia ka ktien”.

Haba jubab ia ka jingiatai nia, u la ong ba ka kam kaba ha khmat eh jong kane ka sorkar kaba mynta ka dei ia ka pule puthi, u ong ba ka ioh ka kot jong ka jylla kan kiew lada kiew ka jingnang jingstad. U khot u wer ia baroh ki paidbah ban ia treilang na ka bynta ban kyntiew ia ka jingnangjingstad ha kane ka jylla.

U la ong ba kane ka sorkar ka plie ia ki Government College ha baroh ki District haka jylla, haba ong kumne kam mut ban lah ban leh hapoh ka shisnem, hynrei ka sorkar kan plie ia ki college sorkar ha baroh ki District jong ka jylla kawei ha dien kawei pat, nalor ba la don ki Community College.

Haba phai sha ki nonghikai SSA kiba khlem ioh tulop san bnai lynter, kane ka sorkar mar ia shimti ia ka kam ka leit ban ia kynduh ia ki heh sorkar pdeng bad da ka jingiakren la lah ban ioh ia ka tulop ka jong ki kaba la sah san bnai kaba la kot sha ka T.135 klur tyngka, kaba sah ka dei ka Arear kaba la kot sha ka hynniew bnai bad ka jinglut kan long kum ba T.86 klur tyngka. Ka sorkar kan shim khia ban kyntiew ia ka pule puthi haka jylla.

Haba phai sha ka shong suk shongsain, u la ong ba na ka liang jong ka sorkar kan leh ia kaba don kam ban peit ba ki briew kiba na bar kin nym ioh ban rung katba ki mon sha kane ka jylla dei na kane ka daw ba ka sorkar kala buh ia ki Task Force Committee ha baroh ki District jong ka jylla. Ban pynkhlain shuh shuh ia tand pulit ka sorkar kan shna noh ia ki Police Station, ha Nonghyllam, Nartiang bad ha Jingal.

Haba phai sha ki kam ialehkai u la ong ba ka National Games 2022 kan long kaba kongsan ia ka jylla namar kane kam dei eh tang ka jingialehkai hynrei kan wanrah ruh ia shibun ki kylla haka jylla, la ka long ha ka bor ding eletrik, ki surok, ki jaka jngohkai pyrthei bad bun kiwei kiwei dei.

Ha ka jingkren jong u mytnri rangbah u la kdew ia bun ki kam kiba ka sorkar kanleh bad ha ka juh ka por u la pynpaw ia ka jingsngewnguh ka jong u ia baroh ki dkhot hapoh ka iing dorbar kiba la ia shim bynta bad kiba la ai jingmut ia ka sorkar kumno ban iaid sha khmat  ha kaba kyntiew ia ka jylla ha baroh ki liang, u la kyntu ia baroh ba lada ki don kano kano  jingai jingmut sha ka sorkar long kiba la kloi ban wan sha khmat.

 

What Next?

Recent Articles

Leave a Reply

Submit Comment

*