Shillong, Naiwieng 6: Ka KSU Nehu Unit ha ryngkat ka jingiadon lang ka KSU Education Cell Sengkmie hynne ka sngi 6 tarik Naiwieng ka la pynlong da ka jingiakhih ba jar jar da kaba rah iaki placard bad iaid sha ka ophis treikam jong u Vice Chancellor ka skulbah NEHU.
Kane ka jingiakhih ka long halor ka jingshim rai jong ka academic council ban pynrung iaki samla lane ban shim admission da kaba shu peit ne thew tang na ka marks ne kata ka percentages ba ki khynnah ki ioh ha ki eksamin ki jong ki.
Ka KSU Nehu Unit ryngkat bad ka KSU Education cell ka pynpaw iaka jingpyrshah halor kane ka rai jong ka Nehu halor ka nongrim ba kan noh shiliang lane kan ktah iaka jingrung class khamtam ki paradoh parasnam sha ka skul bah NEHU namar katkum ka jinglap bad jingiohi ha ki snem ba la leit la shem bad paw shai ba ka jingrung class jong ki samla khamtam ki para doh para snam ka duna bha khlem ka entrance test namar haba ia nujor ia ka rukom ai marks jong kiwei pat ki skulbah kiba don sha kiwei pat ki jylla ka pher shibun bah katba ha Nehu lane ki kolej kiba iasnoh bad ka skul bah NEHU ka duna haka rukom ioh marks ne ka percentage .
Ka KSU halor kane ka pyrshah shi katdei bad dawa ba ka NEHU kan dei ban wad ki lad ki lynti ban pynlong iaka entrance test la kumno kumno bad ruh ban ki paradoh para snam kiba thrang ban bteng iaka jingpule ka jongki ha ka skul bah NEHU kin dang ioh ka lad bad ba kin nym sakut shiteng por tang na ka daw jong ka jing bym shah pdiang iaki, namar kumba long hi mynta ki samla ka jylla kiba thmu ban bteng iaka jingpule jong ki nym ioh lad shuh ban bteng shabar lane kam long shngain iaki ban pule shabar ha kum kane ka por ba hiran ha ka jingwan tyllep jong u ne u khlam covid-19.
Ka KSU NEHU Unit bad ka KSU Education cell ka la pynpaw ruh iaka jingsngewkhia halor ka jingslem ban pynbna ia ki Tarik na bynta ka eksamin haba iadei bad ki backlog papers jong ki khynnahnha ki semester bap her ba pher. Ka jingpynslem jong ka nehu ban pynbna ne pynbeit halor katei ka bynta ka la pyndukha jingmut ia shibun ki samla pule kiba don ka jingthrang bad jingthmu ban bteng iaki jingpule jong ki ba shalor khlem da lah ban pyndep iakine ki back papers bad kane kan buh jingeh shi katdei iaki ba kin bteng iaki jingpule ki jong ki shakhmat . Ka KSU halor kane ka dawa na ki bor ba dei peit jong ka NEHU ba ka dei ban pyndep noh iakine ki eksam hapoh jong une hi u bnai.
Ka seng ka la pynpaw ruh iaka jingsngew khia ba ka jingslem jong ka nehu ban pynbna iaki resol khamtam jong ki samla na ki kolej ba iasnoh bad ka nehu(affiliated College) namar ka jingpynslem iaki resol ka buh jingeh shuh shuh iaki nehu ban bteng iaki jingpule ki jong ki. Ka seng halor kane ka dawa ba ka nehu ka dei ban pynbna noh mar mar iaki resol khamtam jong ki UG hapoh kine ki taiew ban wan.
Ka seng hadein ka jingpynlong ka jingiakhih ba jar jar mynne ka sngi ,naka liang ki bor jong ka nehu ki la khot iaki nongialam ka KSU NEHU UNIT bad KSU Eductaion cell mar mar ban iakren,bad ha ka tei ka jingialang ka la pynsngew halor kitei ki mat bad na ka liang u VC haka jingiadon lang ki bor pyniaid ka Nehu ki la rai ban wad ia ki lad ki lynti ban pylong iaka entrance test khnang ba kan nym noh shiliang bad ban pyntikna ba ki trai jylla ki dei ban ioh bhah bun ha ki department bapher bapher kumba ka seng ka la dawa.
Haba iadei pat bad ka mat halor ka jingpynslem ban pynlong iaki back log papers naka liang ka nehu ka la kular ban pynlong noh ia ki backlog paper exam bad kumjuh ruh ban pynbna noh iaki result ha shua ban kut u bnai hi.
Ka seng halor kine ki mat bala dep iakren mynta ka sngi kan nym shong kli kti lane ban sangeh tang hangne hynrei kan iai buddien ha kine ki sngi ban wan bad ruh ban peit pyrman iaka rukom treikam jong ka NEHU khnang ba kan nym don kano kano ka jingdkoh bad ba ki kam kin iaid beit.la ong u samla Richest Malngiang General Secretary KSU NEHU UNIT ha ka kyrwoh ka ba la phah mynta ka sngi.
