Shillong, Jylliew 04: U Myntri rangbah ka jylla I Conrad K Sangma ha ka jingiadon lang ka kynhun myntri mynta ka sngi u la ia kynduh ia ka kynhun jong ka 15th Finance Commission kaba la wan sha Shillong, bad ha kane ka jingiakynduh na ka liang jong ka sorkar Meghalaya ka la ai sha ka Commission ia ka jingdon kam pisa jong ka jylla na ka bynta kine ki san snem ban wan ka long T. 82,815 klur tyngka.
Na ka liang jong ka sorkar kala ai da ka jingthoh sha ka Commission bad ia katei ka pisa kaba ka sorkar kala phah la phiah ia ki katkum ka jingdon kam ha ki tnad bapher bapher bad ha ba khein kyllum baroh ka jingpyni jong ka sorkar jylla sha ka Commission ia ka jingdon kam pisa ka sorkar ha kine ki san snem ban wan ka long T.82,815 klur tyngka.
Ha dienb a la dep ban ia kynduh ia baroh ki dkhot jong ki kynhun bad ia ka sorkar na ka liang jong u N K Sing Chairman jong ka 15th Finance Commission u la ong ba na ka liang jong un nym lah ban kren ei ei ia kaei kaba la pynsngew ha u hynrei ka ei kaba u lah ban kdew ia kaei kaba ka jylla ka don kam.
U Chairman jong ka 15th Finance Commision u la kdew ba ka jylla Meghalaya ka long ka jylla kaba itynnad haduh katta katta bad ka lah ban kyntiew ia ka kam jngohkai pyrthei ym tang ban bun ki nongwan kai hynrei kin don ki hotel kiba lah ban wanrah ka jingiaioh ia ka jylla.
U la kdew ruh ba ka Commission kan pynsngew ia kaei kaba kila ioh ban ia kren bad baroh kito kiba la wan ban ia kynduh bad ka kynhun ha kane ka jingiakynduh la ia mir jingmut bun ki bynta ha kaba kin sa pynsngew. U la ai ka jingiaroh kaei kaba ka sorkar Meghalaya ka la pynpaw ha kaba ia dei bad ka jingpan pisa na ka bynta ki kam pynroi ha kane ka jylla.
