Shillong, Lber 21: U Mytnri Rangbah ka jylla u Cornad K Sangma u la leit ban shim bynta ha ka “Dandi March” ha ka jylla Gujarat ha kaba u la iaid na Kareli sha Gajera lemb ad 80 ngut kiwei pat ha kane ka jingiaid lynti kaba 15 km, ia kane ka jingiaid la plie paidbah da u myntri rangbah duh ka Ri India ha ka 12 tarik mynta u bnai.
Kane ka jingle bad kynmaw burom ia ka Dandi March kaba la sdang ha ka 12/3/2021 kan kut ha ka 05/4/2021, u myntri rangbah ka jylla u la ong ba kane ka Dandi March ka long kaba don kam namar ka Ri kan sa rakhe ia ka jingdap 75 snem jong ka jinglait luid ka Ri.
Kane ka jingiaid u kpa ka jaidbynriew ha u snem 1930 ia kaba la tip kum ka “Dandi March” 91 snem mynshuwa ka long ban ia leh pyrshah ia ka jingsynshar dobor ki phareng ia ka Ri India.
Ha kane ka jingiaid lynti u myntri rangbah u la pyndon burom ia u kpa ka jaidbynriew ha Kareli ryngkat bad ka myntri khynnah ka jylla Gujarat ka Vibhavari Dave namar dei ha kane ka shnong ba u Mahatma Gandhi u la shongthiat bad ia iing ba u shong la pynneh bad sumar da ka sorkar Gujarat.
Kane ka jingiaid paidbah ha kaba sdang ki don tang 80 ngut ki briew hynrei katba dang iaid da ki lak ngut ki briew kila wan ia snohkti lang bad kane kala khring ia ki ri jong ka pyrthei ha kane ka jingialeh laitluid jong ka Ri India na ka kti ki phareng.
U Myntri Rangbah ka jylla u la kyntu ia ki samla ha Kareli ba ki dei ban sngew sarong ba ki dei ki nong India bad u la ong ba u sngew kmen ban ioh ban jngoh ia ka jaka jong u Bapu u ba la ia lam ban ia khun pyrshah ia ki phareng ban pynioh ia ka jinglaitluid jong ka Ri.
Ha kane ka jingialang paidbah u Cornad u la ong ba u mytnri rangbah duh jong ka Ri India mynta u la wan jngoh bun sien ia ka North East ban pynthikna ba ka rai ka par kan kiew ha kane ka thain namar ia ka North East la leh klet da ki phew phew snem mynshuwa.
Ha kane ka jingialang la ong ba na Meghalaya ruh kila don ki riew khraw kiba la ia khun pyrshah ia ki phareng ban pynioh ia ka jinglait luid, kum u Kiang Nangbah, U Tirot Sing Syiem bad u Pa Togan Sangma.
U Myntri Rangbah u la pynkynmaw ia ki ktien u woh Kiang nangbah ha ka por ba ki phareng ki sdien phasi ia u, u la kren kumne “ Lada ka khmat jong nga ka phai sha mih ngi ha u dieng phasi ka Ri India kan sa ioh ia ka jinglaitluid bad lada ka phai sha sepngi ki phareng kin iai bteng ban synshar”, ha kane ka jingsdien phasi ka khmat u kiang Nangbah kala phai sha mihngi kane ka la jia shi sha kumba la kren.
U Myntri Rangbah u la ong ba dei ban pyntip sha ki paidbah jong ka Ri India ha kaba ia dei bad ki nongialeh laitluid jong ka Ri India kiba dei na kylleng ka Ri India, kyntup ia kiba na North East bad kum juh kiba na shathi jong ka Ri India.
