Shillong, Nailur 25: Kum shibynta na ka jingrakhe ia ka taiew lehkhuid hapoh ka Ri India baroh kawei ia kaba la tip kum ka “Swachhta Hi Seva”. Ka District Water bad Sanitation Mission da ka jingiatreilang bad ka tnad sam umbam umdih jong ka sorkar jylla mynta ka sngi kala pynlong ia ka “Samagra Swachhta” ha Mattilang Park, ha ka shnong Laitmynsaw kaba hap hapoh jong ka Mynlliem C&RD Block ha kaba la plie da u Latjong ka jylla u Banwarilal Purohit u ba long ruh u kongsan ha kane ka sngi.
Ha ka jingkren jong u Lat ka jylla ha kane ka sngi kum u kongsan u la ong ba ka ‘Swachh Bharat Mission’ ka dei ka jingangnud jong u luk u lak ba ki sawdong sawkun kin long kiba khuid kiba suba bad kajingkhuid jingsuba ka dei ka jingia bit ia biang lang jong baroh. U Lat u la ong ruh ban ka ‘Swachhta Hi Seva’ ia kaba la plied a u president jong ka Ri u Ram Nath Kovind ha ka shnong Ishwari Ganj ha Kanpur ha ka 15 tarik mynta u bnai kan kut ha ka 2 tarik sngi khau u kpa jong ka jaidbynriew u Mahatma Gandhi.
Ha kane ka sngi u Lat ka jylla u kdew ia ka jingkhuid jong ka shnong Mawlynnong kaba dei ka shnong kaba khuid tam ha ha ka dewbah Asia, la ong ban wanrah ia ka jingkhuid ka dei ka kam jong ka jingangnud lang da baroh ban ong ba ki iing ki sem, ki jaka paidbah, ki jaka sor bad lada lah ban leh kumta la lah ban pynurlong ia ka jingthmu jong ka Swachh Bharat.
Ban pyndon burom ia u kpa jong ka jaidbynriew ha ka rukom ka ba bit ba biang, ka ri ka khot ka wer ia baroh kumjuh ia ki paidbah jong ka jylla Meghalaya ban mih sha khmat ban long kiba leh khuid bad ban pynlong ia ka jylla kaba khuid bad kaba jyrngam u la ong.
Ha kane ka sngi u myntri kam pynroi sor u bah R V Lyngdoh, u la ia don lang. Ha kane ka sngi la sam ruh ia ka khusnam sha ki nongjop jong ki nongiashim bynta ha ka jingiakop dro dur. Ha kane ka sngi ka kong Telinia Thangkhiew MDC ruh kala ia don lang, u Principal Secretary ka tnad sam um u bah D P Wahlang, u Secretary ka tnad sam um u ba long ruh u Mission Director, Swachh Bharat Mission (Gramin),ka jylla u Bah W. R. Lyngdoh, u Deputy Commissioner, East Khasi Hills District u ba dei ruh u Chairman, DWSM, u Bah P. S. Dkhar, ryngkat ki Rangbah Shnongs, lem bad ki khynnah skul kila ia don lang.
