Shillong, Naiwieng 10: Ka party 
HSPDP mynta ka sngi kala plie ia ka jingrakhe ia ka jubilee Ksiar jong ka party, hapoh ka ophis jong ka seng kaba don Boyce Road ia kaba la plie mynta ka sngi da u President ka seng u Bah KP Pangniang.
Ha ka jingkren jong u Bah Pangniang kum u president, u la batai ia ka jingiaid lynti jong ka seng haduh mynta ka sngi. U la batai bniah ba dei ka seng HSPDP kaba la pynioh ia ka jylla ba pura ia ka jylla Meghalaya. La ong ba ha ka sngi pynkut ia kane ka jingrakhe ia ka jubilee ksiar kin khot ia baroh ki MLA kiba la jop na ka seng wat la ki don ha kiwei ki party ha ka 15/12/2018.
Dei halor ka jingthoh jong ka seng HSPDP ha ka 26/09/1970 ha dien ba ki nongialam jong ka APHLC ha kato ka por kila pdiang ia ka Autonomous State. Ha kane ka shithi u president ka seng u Bah Hopingstone Lyngdoh bam kwai ha dwar u blei u la thoh sha ka myntri rangbah duh barim jong ka Ri India ka Indira Gandhi bam kwai ha dwar u blei, ba lada kam ai ia ka jylla ba pura kin nym ia kren shuh bad sorkar India.
Deo halor katei ka shithi ba ka Indira Gandhi kala khot ia u president ka seng u bah Hopingstone ha ka 10/11/1970 ha ka jingialang ha Guwahati bad kala kular ban ai ia ka jylla ba pura, tang ba ka long ba kam lah ban rai marwei ka hap ban ia kren hapoh ka kabinet. Dei ha ka 20/01/1972 la pynioh ia ka jylla Meghalaya ka jylla ba pura bad la wan plie ha ka 16/03/1972 ha Madan Polo.
U bah Pangniang ha kane ka jingialang ban plie ia kane ka jingrakhe jong ka jingdap 50 snem jong ka seng u la ong ba ki nongrim kiba ka seng ka iieng naduh ba sdang ia ka ha ka 10/11/1968 haduh mynta ki dang neh bad kim pat kylla. U la ong ka party kala mad ia ki jingeh kiba bun ha kine ki 50 snem jong ka jingiaid lynti hynrei ka dang iai bat ia la ki nongrim.
Ki nongrim jong ka seng HSPDP naduh ba sdang haduh kine ki sngi, ka long ba ka seng ka iinng skhem ha ka nongrim ban nym shah ban tih Uranium na kane ka jylla Meghalaya. Kan trei na ka bynta ka bit ka biang jong ki paidbah. Ka party ka ieng skhem ban iada ia ki riti dustur. Ban pynbeit ia u pud u snam bad ka jylla Assam.
Ka ktien Khasi ka dei ban ioh rung ha ka khyrngit kaba phra jong ka Riti Synshar jong ka Ri India. Ban don ia ka polisi ha kaba ia dei bad ka kam ban tih ia ki marpoh khyndew ha ka jylla katkum ki kyndon ain. Ban don ia ka polisi ha kaba ia dei bad ki kam karkhana. Ka polisi ha ka ioh kam ioh jam.
Ban iada na ka jingwan tuid ki briew ba na bar sha kane ka jylla, da kaba pyntrei kam ia ka Inner Line Permit lane da kaba pyndon kam ia ka NRC. Ban don ia ka polisi na ka bynta ki nongrep bad ban pynkhlain ia ki District Council. Kine nongrim kiba ka seng kala ieng naduh ba sdang bad ka dang iai bat ia ki haduh mynta.
Kiwei ki nongialam jong ka seng kiba la kren ha kane ka jingialang ki long u bah Witting Mawsor u bala kren ba kumno la beh ia u Bah Hopingstone na ka APLHC bad ka sa mih ka HSPDP, u bah Martile Mukhim, U bah LG Nongsiej, Kong Telinia Thangkhiew, Bah Samlin Malngiang bad ia ka jingialang la pyniaid da u Bah Renikton Tongkha.
