Shillong, Rymphang 18: Na ka liang jong ka HYC Sohïong Circle hadien ba ki la pan jingtip lyngba ka RTI na ka Executive Committee ka KHADC ka la lap ba don san tylli ki jingtang jait kiba ka seng ka lap ba ka long pyrshah ia ka Riti Dustur u Khasi bad kumjuh ruh ia ka KHAD (Khasi Social Custom and Lineage) Act) 1997.
Kaba ka seng HYC ka lyngnoh ka long kumno ka Executive Committee jong ka KHADC ha ka por ba long CEM u bah Ardent M Basaiamoit bad u Bah P N Syiem ki ai jingmynjur ia kine ki san tylli ki jing tang jait.
Ha ka jing pynmih khubor ha ka 12 tarik Rymphang, 2021 ka seng kam shym la ong ba u Bah Arden u Tang jait hynrei ka ong ba ha por jong u ba ki don ki dkhar kiba ïoh jait Khasi ba la tang da kiba jer kyrteng ha ka tei ka sngi bad ka seng ka kren shai hangne ba kam shym la pyrshah ïa ki jingtang jait ba leh kat kum ka Riti u Khasi hynrei ka pyrshah tang ia ki katto katne kiba khlem shym la ïaid kat kum ka Riti .
Lyngba ka RTI ka HYC kala lap ba ka KHADC ka la pynskhem ia ka jingtang jait ia ki dkhar ha kaba baroh ar liang ka Kmie bad u Kpa ki dei ki dkhar hynrei la tang jait Khasi ia ki bad ka Executive Committee ka KHADC ka mynjur ia kata kaba long pyrshah ia Riti u Khasi bad kumjuh ruh ia ka Khasi Lineage Act. Kum ka seng ka lyngoh ruh ba don ki Agent khyndew ruh ki tang jait bad kaba pynkyndit eh ka long wat ki dkhar ruh ki tang ia ka jait ka khong Khasi.
Ka HYC ka dawa na ka KHADC ba kan sngewbha ban bishar bniah ia kane ka kam namar lada ki dkhar ki lah ban long Khasi noh ha ka kyrteng ka Tangjait yn sabun kiban shim kabu ban Tangjait ban lait ka shim trading licence, ban ioh thied khyndew ha ki tribal area, ban ioh ka bhah na ka Meghalaya Reservation Policy , ban ïoh ïaleh election na ki ST reserved seat bad kumjuh ruh ban lait na ka Income Tax. Te kan sa ktah shi kadei eh ia ki hok kyrpang ka Jaidbynriew Hynniewtrep jong ngi.
Ka Seng ka kyntait war ia ka jingong u bah Ardent ba kila kren sniew ne kren khlem akor ïa u Fr Sngi . Ka Seng ka la dep pynshai ia kane ha ki sngi ba la dep . Ka Seng kam kwah ban ia kren jngai halor kane namar ioh ka pynmih pynban ia ka Jingia sngewpher Niam ha ka Jaidbynriew Hynniewtrep namar ngi buh ia ka Jaidbynriew ha khmat ia ki Niam hadien wat la ngi burom ia baroh ki Niam bad ki Balang.
Ha kaba iadei pat bad ka jing pan jingpynshai u bah Ardent ka sngew ban ong ba ka Executive Committee lyngba ka Registration Authority ka KHADC ka ai jingmynjur ia kine ki jingtang jait kiba long pyrshah ia ka Riti u Khasi bad ka Khasi Lineage Act ha ka por ba long CEM ma u bad ki don ruh ha ka por u Bah P.N Syiem.
Ka seng HYC ka la ong ba ki long la kloi ban ai ki kot ki sla ha u bah Ardent ban pynshisha ba ka don ka jingtang jait beain bad beriti ha ka por ba long CEM jong u ha KHADC.
Lada u la kwah ban leit beit sha iing bishar ruh, na ka liang jong ka seng ki long ba la khreh ban pyni bad sei ïa ki jingshisha baroh, kane ka long katkum ka kyrwoh kaba la phah da u samla Purningstar Shabong president bad u samla Hamarbamut Thabah GS ka HYC Sohiong Circle ha ka kyrwoh kaba la phah mynta ka sngi.
