Shillong, March 28: U myntri ba dei peit ia ki kam bor ding ha kane ka jylla u Bah Sngewbhalang Dhar haba plie ia ka jingpyninam ia ka rukom pyndon kam ia ka bor ding na ka bor jong ka sngi ia laba la pynlong da ka Meghalaya New and Renewable Energy Development Agency (MNREDA) ban pynshlur ia ki paidbah ban pyndon kam ia kane ka rukom pynioh bor ding na ka sngi, u la ong ba ka jingeh kaba khraw tam ia ka jylla kaba don mynta dei ka jingduna ha ka bor ding.
Na ka liang jong u myntri u la ong ba ka jingbym biang ha ka bor ding eletrik kala ktah shibun ia ka ioh ka kot jong ki paidbah ha ka jylla baroh kawei. Ka sorkar kala shim khia bha kumno ban pynkhlain ia kane ka jingpynioh bor ding eletrik na ka bor jong ka sngi ia kaba la tip kum ka Non-conventional energy. Na ka liang jong ka sorkar kan ai ka jingkyrshan ia ka MNREDA ha kane ka liang.
Ha ka jingkren jong u Principal Secretary ka tand pynmih bor ding u la ong ba ka jylla haduh mynta ka dang shaniah tylli tyllan ha ka bor ding kaba la pynmih na ka um, u dewiong bad ki dieng bad kum kine ki jingpynmih bor ding kam shym la ktah tang ia ka mariang hynrei kine ki long shipor. Kane ka rukom pynmih bor ding kum na ka sngi, ka lyer bad mar pyut ban pynlong ia kane ka rukom pynmih bor ding kaba jop don kam ia ka jingpynsngewthuh ia ki paidbah.
Ka jingpynlong ia kane ka jingpyninam ka long ban ai lad ia ki khynnah skul ba kin ioh ia ka jingtip kaba kham shai da kaba iohi da la ki jong ki khmat ha kaba ia dei bad kane ka rukom pynmih bor ding. Kiba la ia don lang ha kane ka sngi ki long u U N Madan bad shibun bah ki khynnah skul.
