Shillong, Jymmang 15: U bah Renikton L Tongkhar MLA jong ka party HSPDP, u la ong ba ka kam pud kam sam dei u klongsam jong ka party HSPDP naduh ki por kiba mynshuwa haduh mynta.
Haba kren ha ki lad pathai khubor mynta ka sngi u la ong ba na ka liang jong ka party kan sa leit ban ia kynduh ia u myntri rangbah ka jylla ban ia kren halor ki kam pud kam sam jong ka jylla kaba khlem pat lah ban ia pynbeit haduh mynta bad ka jylla Assam.
Haba ia dei bad ka jingjia hapoh Balakhawa, u tei u nongialam jong ka HSPDP u la ong ba ka daw baroh kawei na ki kam pynroi, ha ka jingleit jong u sha katei ka shnong u la sngewthuh ba ki don kiba kwah ia ki kam pynroi bad don kiba pyrshah.
U la ai ka jingiaroh ia u Bah Michael Warjri Secretary jong ka Hima Nongspung u ba la leit ban sah ha katei ka jaka kaba hap hapoh u pud u sam jong ka jylla Meghalaya, u la ong ba ka party ka kwah ia ki briew ba kin leit sah sha ki khappud kum ba leh u bah Michael.
Na ka liang jong ka HSPDP kaba don lang ha kane ka sorkar kan sa ia kynduh ia u myntri rangbah ka jylla ban ia kren ba ha ki shnong kiba don ha kahppud bad ka jylla Assam dei ban shna noh ia ki surok khnang ba ka surok kan long ka pud ka sam bad ka jylla Assam ba ki briew kin tip kano ka bynta jong ka Meghalaya bad kano ka bynta jong ka Assam.
U Bah Renikton u la ong ba ym lah ban len ba ki shnong ha khappud ki dang long shisha kiba sah dien dei na kane ka daw ba ki paidbah ki kwah ia ki kam pymroi bad ki sa tur ruma ban pdiang ia ki kam pynroi katna ba wan bas a mih kine ki kynrum kynram.
