Shillong, Naitung 20: Ki MDC jong ka KHADC kiba don ha la liang synshar haba ia shim bynta ha ka jingai khublei ia u Bah Equator Nongrem Deputy Chairman u ba la shah jied mynta ka sngi ha ka elekshon kila pynpaw ia ka jingsngediaw ka jong ki ban iohi ba ki liang pyrshah kim shym ka wan ban ia shim bynta ha ka iing dorbar.
U CEM jong ka KHADC, u Bah HS Shylla ha ka jingkren ka jong u la ong ba ka iing dorbar haba pyniaid ia ka dei ban pyniaid katkum ki rule kiba la don, haba ki rule kim shai u Chairman u hap ban pyndon kam ia ka Rule 123 bad lada kane kam shai hap ban leit pyntip sha u Lat jong ka jylla.
Haba ia dei bad ka jingpep jong ki liang pyrshah ban wan sha iing dorbar u CEM u la ong ba kane ka jingleh ka long kaei kaei ka bymitynnad , namar ha ka synshar paidbah ka long beit ha ka jingiabun paid. U la kyntu ia u Deputy Chairman ba wat la u dei na ka liang synshar ud ei ban bat ia ki rule ba ym dei ban ia shah liang.
Ha ka jingkren jong u Bah Manstudy Nongrem, u la ong “ Nga sngewsih bad ka long kaei kaei ka bym sngew tynnad ban iohi ba ka liang pyrshah kim don hapoh ka iing dorbar nga la long MDC naduh u snem 2004 dei ka sien kaba nyngkong ban iohi ba ki liang pyrshah ki pep dorbar”.
U Bah Nongrem, u ba la long teng u CEM bad ha ka juh ka por u ba la bat ruh ia ka kam Chairman bad kum u nongialam ka liang pyrshah u la ong ba ia ka liang pyrshah mynta hap khot noh ka liang “Abstain” ym dei shuh ban ong ka liang pyrshah.
U Bah Teinwell Dkhar ha ka jingkren ka jong u la kyntu ia u Deputy Chairman ba um dei ban ia shah liang, u la ong ba haba ki don ha ka liang pyrshah kila pyrshang ban pynkhyllem ia ka EC hynrei kim lah, hynrei kim juh pep pat ban wan sha ka iing dorbar namar kane ka dei ka synsahr paidbah. Kane ka jingpep iing dorbar ka liang pyrshah ka long ba kim burom ia ka iing dorbar jong ka KHADC.
Ka kong Telinia Thangkhiew kaba la pyniaid ia ka jingjied ia u Deputy Chairman kum ka Protem Chairman, kala pynpaw ia ka jingsngewdiaw ba ki liang pyrshah kim shym la wan ban ia shim bynta ha ka iing dorbar bad ka kyrmen ba kin wan ban ia shim bynta ha kiwei pat ki jingiashong dorbar.
U Bah Eguator L Nongrang ha ka jingkren ka jong u mynta ka sngi hapoh ka iing dorbar u la ai khublei ia u CEM bad ia ka kynhun kaba la ibit ban jied ia u kum u Depty Chairman jong ka iing dorbar hapoh jong ka KHADC.
