Shillong, Rymphang 28: U myntri rangbah jong ka jylla u Dr Mukul Sangma u la ong ba ka cabinet mynta ka sngi kala pdiang ia kito baroh kiba la thung kam thymmai ha ki saw tylli ki block kiba la dep ban plie bad kum juh sa ha ki ar tylli ki block ki ban sa plie ha kine ki sngi kiban dang wan. Baroh kine kiba la pdiang da ka cabinet mynta ka sngi ka long ba la thung kontrk ia ki kat haduh ba ki bor ba dei peit kin pyndep ia ka rukomthung kam.
Ki block kiba dang sah mynta ban plie ki long ka Bajengdoba bad ka Mawlai Block, haba ia dei bad ka Mawlai Block ka sorkar kam pat rai ia ka jaka, ka dang peit bniah mynta kano ka jaka kaba long pdeng ia ki paidbah namar ka jingpynmih thymmai ka sorkar ia ki block ka long ban suk u paidbah, namar ha ki block ki skhim sorkar baroh ki don lut.
Ka cabinet ruh mynta ka sngi kala pdiang ia ka rai ban pynkylla noh ia ki jingthoh baroh na kaba lajuh but baroh shikatta Assam schedule sha ka Meghalaya Schedule ha kaba ia dei bad ki phom. Ban khring ia ki nongwan seng kam ka cabinet kala pdiang ruh ban wanrah ia ka jingkylla ha ka Meghalaya Industrial Promotion Development Policy jong ka sorkar.
Haba ia dei bad ki katto katne ki jaka ka cabinet kala pdiang ban jer kyrteng thymmai kum ia ka shnong Garom pane sha ka kyrteng Psiar, ia ka Ganesh Das Hospital la jer kyrteng sha ka Ganesh Das GovermentMaternal and Child care Hospital, ia ka surok sawdong jong ka Synod College Jowai la jer kyrteng da ka Thomas Joan Road, ia ka Rilong Chowk lajer kyrteng noh da ka Captain Clifford Nongrum Squar. Bad ha kane ka cabinet kila ia kren kham bniah ha kaba ia dei bad ka jingthoh kaba ia dei bad ka jingkren jong u Lat kaba un kren ha ka sngi sdang jong ka dorbar mang tyngka mynta
