Shillong, Lber 01: U myntri rangbah jong ka jylla u Dr Mukul Sangma mynta ka sngi u la kyntiew kyrdan ia ka Mawngap Out Post sha ka kyrdan police station kaba pura. Ha ka jingkren jong u myntri rangbah haba plie ia kane ka police station u la ong ba ka tand pulit mynta kala hap ban leh shibun ki kam bad ka hap ban shim ia ki jingkit khlieh ha kiba bun ki kam bad ki hap ban ialeh ia shibun ki jingeh.
Na ka liang jong ka sorkar kan sa dang pynkhlain shuh shuh ia ka rukom trei kam jong ka tnad pulit naka bynta ka roi ka par tuh kum juh, kumba ka long ki nongleh kam sniew ki kylla shlur haba kim don ki briew kiba peit ia ka ain bad kaba don kam mynta ka long ban pynrung ha ki briew ia ka jingsngew ba ka ain ka don bad kane kan pynlong ia ki paidbah ba kin tieng burom ia ka ain bad kane kan wanrah ia ka jingbha ha ka imlang sah lang.
U myntri rangbah u la ong ba ka jingplie ia ki Police station, ki Block bad ki Civil Sub Division ka long na ka bynta ka bha ka miat jong ki paidbah nongshong shnong. Kane ka jingkynitew kyrdan ia ka Out post sha ka Police station kan iarap bad pynsuk ia ki paidbah. Ia ka jingpynbna sorkar la pule da u Bah EP Kharbhih secretary ba dei peit ia ki kam poh iing bad la ai ia kane ka jingpynbna sorkar sha u OC jong ka Mawngap police station.
Kiba la ia don lang ha kane ka sngi ki long u Bah HDR Lyngdoh Myntri kam poh iing, u MLA jong kane ka jaka u Bah Kennedy C Khyriem, u Bah L Blah MDC u Dr S B Singh DGP jong ka jylla bad u heh duh jong ki pulit jong ka East Khasi Hills, u Bah M Kharkrang.
