Shillong, Risaw 11: Wat la u myntri ba dei peit ia ka tnad rep u bah Banteidor Lyngdoh u la dep ban pynbna ba ka sorkar kala shim ia ka rai ban shah biang ban pyndon kam ia ka dawai sboh na ka bynta ki nongrep ha ka 26 Nailar 2022 hynrei haduh mynta ka Meghalaya State Cooperative Marketing and Consumer’s Federation Limited (MECOFED) kam pat ioh jingthoh na ka sorkar ban thied ia ka dawai sboh.
Ha ka jingbuid dien jong u SP News Agency haba ia dei bad kane ka rai jong ka sorkar ban shah biang ban pyndonkam ia ka dawai sboh, ki thymmei khubor ki iathuh ba haduh kine ki sngi ka sorkar kam pat ai kano kano ka jingthoh sha ka MECOFED katno Metrik Tone ki don ki hap ban leit leit na Indian Farmers Fertilizers Cooperative Limited (IFFCO).
Wat la ka sorkar pdeng kala shah ia ka jylla Meghalaya ban pyndon kam ia ka dawai sboh bad ka sorkar jylla ruh kala pynmih ia ka jingpynbna ban pyndon kam biang ia ka sboh dawai hynrei haduh mynta ka sorkar jylla kam pat pan ia ka bhah na ka sorkar pdeng katno metrik tone ka jylla ka don kam sboh dawai.
Ka sorkar jylla wat la kala dep ban ai ka jingithuh ia ka MECOFED ba kan thied ia ka sboh dawai bad ban dei sha ki nongrep, hynrei kaba ki nongrep ki sah ha ka lyngoh ba ka sorkar kam pat ai kano kano ka jingthoh katno metrik tone ka jylla Meghalaya kan ioh ia ka bhah na ka sorkar pdeng.
Ka sorkar kala pyntip sha ka MECOFED ba la ai jingbit ia ka ba kan die ia ka sboh dawai sha ki nongrep hynrei kam shym ai pat ia ka jingthoh ka ban kdew katno metrik tone ki lah ban leit kit na IFFCO kaba don ha Guwahati, ia kaba ki dang ap ia ka jignthoh na ka sorkar.
