Shillong, Lber 01: Hadien Khadar khatar tylli ki Election ban jied ia ki Member District Council (MDC) naduh u 1952 haduh mynta 2019 (67 snem) ha kaba la dei ban mih tang 12 ngut ki CEM (uwei ha ka san snem ) pynban ha ka synshar laitluid bad kaba laitlan la mih haduh 39 ngut ki CEM hapoh KHADC, ka juh lah ban ong kaba jia hapoh JHADC naduh ba la pyniakhlad ia ka United Khasi & Jaintia Hills District Council lyngba ka notification No. TAD/R/50/64 dated 23.11.1964 ha kaba la mih u CEM JHADC naduh 11 April 1967.
Ha ka jingialeh ban ioh jingithuh ki khlieh nongsynshar ha ka dur ka Grand Council of Chiefs of Meghalaya – Ka Dorbar Ki Khlieh Nongsynshar ka Ri Hynniewtrep – Ka Federation of Khasi States – Ka Dorbar Ki Dolloi – Ki Sirdarships ki la Khmih Lynti ia ki bor sorkar bad KHADC ban shim khia ban pynbeit ia ka Instrument of Accession bad Annexed Agreement 17 August 1948.
Hynrei kaei kaba mih ha kane ka jingialeh ka jingdawa ka long ba ki Nongialam jong ki party seng sain pyrthei baroh ki la khien sting palat ia katei ka dulir IOA & AA, bad kane ka paw dur ha ki jingeh kiba pher bapher kum ka nuksa ka jingiatyngkhuh bad ka Forest Conservation Act 1980 kabym ithuh ia ki khlaw shnong, khlaw kur, khlaw shimet, khlaw raid, khlaw hima, law kyntang.
ka jinglong kyrpang ka jinglong trai ha kitei ka rukom pyniaid khlaw, kat haduh ba ngim lah ban plie dukan dieng shna jingkhang iit lane wat ban shna lyntang siang iing, namar hap plie ia kitei ki kharkana dieng tang hapoh ki “industrial estate” , kaba sngewsih ka long ba wat ka Resolution jong ka Assembly halor ka kam khlaw ha u snem 2000 la lap lyngba ka RTI ba khlem phah sha ka Sorkar India. Shuh shuh ngi dang iai sah kut halor ka kam jinglong trai ki maw poh khyndew la ngi phai sha u dewiong, ne mawshun ne shiap bad kumta ter ter namar ki Ain India ki la don lupa kiba knieh ia kitei ki hok jong ngi.
Ha katei ka lynti jingiaid ka Federation of Khasi States na ka por sha ka por la mih ki jingpyrshang ban pynsngewthuh ia ki bor Sorkar bad KHADC ba ki dei ban iakren bad ka Sorkar India ban pyntrei hok ia ki jingkular katkum ka IOA & AA 17 August 1948.
Ka FKS ka la jop ia ka thong hapoh ka Nationak Commission for Schedule Tribes kaba la bthah ia ka Ministry of Home Affairs, (MHA) Sorkar India ban leh ia kaba donkam ban pynrung pyntreikam ia ki jingkular katkum ka IOA & AA 17 August 1948, la poi ka shithi sha ki bor Sorkar Jylla, kiba la pan jingmut na ki bor KHADC naduh u snem 2012.
Hapdeng ka jingbym jubap ka kynhun FKS ki la thoh tur biang sha ka Sorkar India ha u snem 2013-14 bad ka MHA ka la thoh biang sha ka Sorkar Jylla hynrei ka jingbym jubap ki bor KHADC ka pynsa kut ia ka Ri bad ka jaidbynriew ban ioh ia ka Hok, pynban ha khmih kaei kaba mih na ki bor KHADC ka long ka jingthaw ia ki artylli ki Committee bad haduh 3 tylli ki BILL ban pynthame ia ki Khlieh Nongsynshar.
Kita ki long ka jingthaw (notification) ia ka Federation of Khasi Traditional Institution lyngba ka notification 2tarik August 2004, kaba ar ka long ka jingmynjur ia ka BIll kaba kyrteng The KHAD (Constitution of the Federation of the Khasi Traditional Chiefs) Bill 2006, wan sa ka jingthaw (notification) Federation of Traditional Dorbar 3 tarik November 2015, bud sa ka The KHAD (Constitution of Council of Traditional Dorbar ) Bill 2016, nangta khaduh dangshen ka wan sa ka The KHAD (Constitution of Subordinate Council of Traditional Chiefs and Headmen) Rules 2018.
Haba kumne shano ka Ri bad ka jaidbynriew kan poi. Shuh shuh kitei ki Bill kiban la pyrshang da ki bor KHADC ki long kiba khlem bniat namar ba kitei ki Chief bad ki Headmen ki dei kiba khlem pat batai hapoh ka Constitution Ri India, kumta kat kaba kitei ki Bill kiba la iai tyrwa ki long tang kum ki jingpynmyllen katba ym pat shoh tlot lut baroh.
Kumta haba ka election ka la kut, ka Dorbar Ki Khlieh Nongsynshar ka sngewdei ban buh jingkylli ia baroh ki MDC kiban sa mih kum ki nongjop lashai bad khamtam ia ki nongialam jong baroh ki political party hato kaei ka thong kaba ki buh ban pynpaw shai ia ka IOA & AA bad khamtam ki KYNTIEN Dorbar Kur, Dorbar Shnong Dorbar Raid bad Dorbar Hima hapoh Constitution Ri India hapoh ka Article kaba kyrpang ne kin shu pynthame sah ia ki paidbah kynthup ki nongsynshar shnong, nongsynshar kur, nongsynshar raid haduh nongsynshar hima lyngba ki bill ba bun rukom. La ong u Bah Joh F Kharshiing ha ka khubor ba la phah mynta ka sngi.
