Shillong, Jymmang 18: Ka nguh ia u ‘lei Lum Shyllong da ka Raid Mylliem kaba lai sngi lynter la kut mynta ka sngi ha u Lum Shillong ha kaba ia ka niam ka rukom ha kane ka sngi la pyndep da u bah Deming Nongkhlaw ha kaba la knie da u syiar ryngkuh bad u bah shynrang ba liehsada ha ka jingiadon lang ki mytnri bad u syiem ka hima u pa,im Ainam Syiem.
Ia kane ka jinglehniam ban ainguh aidem ia u ‘lei Lum Shyllong kala sdang ha ka 16 tarik bad la pynkut myta ka sngi ha lum Shillong, ha kaba ia u syiar bad blang la ot bad mait da u myntri Chestar Kharkongkor bad ia u blang la wan lam da u myntri Synteng Nongdkhar ha kaba la don lang kiwei ki myntri rang ka hima mylliem.
U Syiem jong ka Hima Mylliem P,im Ainam Syiem uba la don lang ha kane ka jinglehniam nguh ia u ,lei Lum Shyllong la ong ba u ai nguh ia u blei uba la ai lad naduh ba sdang kane ka jingleh niam Raid Mylliem, Hima Mylliem bad kane ka dei ka jingkyrmen ia ka hima Mylliem.
U Syiem u la ong ba kum u syiem ka jingiadon lang ka long ban ai mynsiem ki raid haba ki don ka jinglehniam khamtam ka raid mylliem, khamtam eh ia ki san kur bad ki khatwei kur kiba la pyndep ia ka niam bad na kane ka jinglehniam ka jong ki ka hima kan long kaba iaid beit iaid ryntih bad banlait na ki kynrum kynram kumba juh long.
U Pa,im la ong ba ha ki snem kiba la leit bun sa tang ki kynrum kynram hapoh ka hima, kyrmen ba da kane ka jinglehniam ka jong ki kan pynlait ia kiei kiei baroh kiba wan hapoh kane ka hima baroh kawei, ka kren kyrmen u Syiem ka Hima Mylliem.
U Myntri Kharlukhi u la ong ba kane ka jinglehniam ka dei kaba la buh la sat da ki long shuwa man shuwa, une u lum Shillong u dei u lam bala bsa iaki khyndai umdih khyndai umtong, kita ki logn ka Umshyllong, Umjarasai, Umsherpi, Umdienglieng, Umkhen, Umngot, Umiew, Umtongsyiem bad ka Umjlein, kine kine ki dei kiba ai um ia ka hima bad shabar ka hima.
Kum ki longdin ki pynpaw ia ka jingsngewnguh ia ki long shuwa man shuwa kiba la buh ia kane ka bynta bad kum ki long dien ki but ia kane kumba la sakhi lang mynta, na ka liang ka hima ka ai khublei kyrpang ia u Syiem, u lyngdoh, ki myntri, ki rangbah nongshat nongkhein kaba bri hynniewtrep kiba la buid aibor, ki seng khasi bapher bapher kiba don ha ka raid mylliem.
Ha kane ka sngi la don lang ki khun ki hajar jong ka Hima Myllien ban ia sakhi lang ia kane ka jingleh niam ban nguh ban dem ha u ‘lei Lum Shyllong, ryngkat ki tynmen ki ki san, ki khynnah jong ka Raid Mylliem kiba la pynphuh pynphiang ia kane ka nguh blei ha Lum Shillong.
