Shillong, Jylliew 13: U myntri rangbah ka jylla u Conrad K Sangma mynta ka sngi u la plie ia ka jaka bret niut kaba dei ha Nongpoh jong ka Ri Bhoi District, ha kaba la long lang u Myntri ka tnad pynroi sor u Bah Hamletson Dohling, u MLA jong ka Nongpoh u Bah M Syiem ba dkiwei kiwei ki nongmih khmat paidbah.
Haba kren ha kane ka sngi, u myntri rangbah ka jylla u la ong ba ka sorkar kala shim khia ia kane ka rukomlum ia niut bad kumno ban bret ia ki dei na kane ka daw ba ka sorkar kala wanrah ia ka “Solid Waste Management Policy”.
La ong ba ia kane ka jaka bret niut la sdang naduh u snem 2007-08 ia kaba la shim khia da ka tnad pynroi sor hynrei dang lah ban pyndep ia ka haduh mynta, na ka liang jong ka sorkar kan ia leh ban pyndep noh ia baroh jingtei kiba la pynsah teng.
Ha ka jingkren jong u, Director, MUDA, u Bah E Kharmalki, u la batai ia ka rukom trei kam jong kane ka jaka bret niut kaba la plie mynta ka sngi da kaba pyndon kam ia ki kor ki bor kiba katkum kane ka juk mynta ban pynlong ia kane ka jaka kaba khuid. La ong ba kan don ka jingiatei lang bad ki paidbah ha kaba lum bad bret ia ki nuit.
Kiwei kiba la don lang ha kane ka sngi ki long u EM jong ka KHADC u Bah Paul Lyngdoh, u Bah Jason Mawlong, MLA, Umsning, , Balajied Ranee, MDC, Nongpoh bad C B Syiem, Chairman, Nongpoh Town Committee, ryngkat ka DC jong ka Ri Bhoi District ka kong R M Kurbah.
