Shillong, Naiwieng 18: Ki shipai BSF kila ioh ban kem hynniew ngut ki nong India kiba khaii masi na Baghmara sha Bangladesh, la ioh ban bat saw tylli ki kali bad 29 tylli ki masi na Phanda kaba hap hapoh jong ka South Garo Hills District.
Haba ki shipai BSF kila pynsangeh ia kine ki kali, kine ki nongkhaii masi kila phet krad na Baghmara ban leit sha Phanda haba iohi ia kane ka jingleh, ki shipai BSF kiba don ha katei ka por kila kerkut ia katei ka jaka bad kem ia kine ki nongkhaii masi.
Ki hynniew ngut kiba la shah kem la ithuh kum , Joynal Abedin 29 snem, Ajijul Haque 32 snem, Shohidul Islam 22 snem, Sanowar Hossain 24 snem, u Mohiruddin Ali 23 snem, u Intaj Ali Fakir 48 snem bad u Fajal Haque 37 snem baroh ki dei na ka jylla Assam. Ka dor jong ki masi kiba la shah kem ka long saw lak tyngka.
Na ka liang jong ki BSF kila pynkhlain shuh shuh ia ka jingpahara ha khappud bad ka Bangladesh ban khanglad ia ki nongkhaii beain. Ki BSF kila ong ba ha khappud mynta ki don shibun bah ki Masi ia kaba ki hap ban die lilam ia ki katkum ka rai jong ka iing bishar.
Ka jingpynpyrkhing ia ka khappud bad ha Bangladesh ka long ba kam dei ban don kino kino ki kam sniew ha khappud namar ba kan don ka ilekshon sha ka iing dorbar jong ka Ri bangladesh. Ia kiba shah kem baroh la aiti sha ki bor jong ka ain ban leh ia kaba don kam.
