Shillong, Naitung 17: Ka party UDP kaba don phra ngut ki MLA hapoh ka iing dorbar thawain ka jylla kiba la poi thep vote ban jied president ha ka election ba la long mynta ka sngi kila long tang hynniew ngut, namar ba u bah Brolding Nongsiej MLA jong ka Mawthadraishan Constituency um shym la don hapoh ka jylla.
Ki MLA kiba la ia poi sha kane ka jingjied president kaba la long mynta ka sngi ha Annex Hall ha Railbong hapoh jong ka iing dorbar thawain ba shipor ki long u Dr Donkupar Roy, Dr Jemino Mawthoh, u bah Embhahlang Syiemlieh, u bah Titosstarwell Chyne, u bah Metbah Lyngdoh, u bah Remington Pyngrope bad u bah Paul Lyngdoh.
Kine ki MLA jong ka UDP shuwa ba kin leit thep vote kila don ka jingia kynduh lang ha kamra jong u Dr Donkupar Roy bad kane ka jingialang ka jong ki ym lah ban tip namar ka jingiakren ka long tang para ma ki . Hynrei la sngewthuh ba kane ka jingialang jong ki ka long ban ia kren ha kano ka rukom ba kin jied president.
Na ka liang jong ka party namar ba ka lah ban ai shabuk la sngewthuh ba la ai lad ia ki MLA ba kin jied ia u ne ka, kat kaba ki sngewbit ha ka jingsngew jong ki na pdeng ki ar ngut ki kyrtong. K a jingiakhun ka long beit hapdeng u Ramnath Kovind jong ka NDA bad ka Meira Kumar jong ka seng Congress.
