Shillong, Jylliew 27: Ka Mawkynrew Block Programme Management Unit kaba dei ka tnat trteikam jong ka National Rural Health Mission (NRHM) ha ryngkat ka jong ia treilang bad ka World Vision India, kala rakhe iaka ASHA Divas 2017-18 ha Holy Cross Higher Secondary School Mawkynrew.
Ha katei ka sngi la pynkup burom kyrpang ruh ia ka Kong Morlian Lawai kaba dei na ka shnong Langning, Mawpyrshong iba la ioh pdiang ia ka Khusnam ‘Best ASHA of Mawkynrew Block 2017-18’.
Ha ka jingialang la wan ban ia shim bynta da kiba bun ki Longkmie, ki khun samla na ki shnong bapher bapher kiba hap hapoh jong ka Mawkynrew Block kynthup ruh ia ki Nongtrei ASHA ha ki Aganwadi Centre bapher bapher.
Ia ka khusnam ‘Best ASHA of Mawkynrew Block 2017-18’ kaba long Rs. 5000/- ha ryngkat ki jing ai sngewbha sha ka Kong Morlian Lawai la sam da u Bah Banteidor Lyngdoh uba long ruh u MLA bad MDC jong ka Mawkynrew Constituency, u ba dei ruh u myntri jong ka sorkar ba long u kongsan ha kane ka sngi.
Haba kren kum u Kongsan ha katei ka sngi na ka liang jong u Bah Banteidor Lyngdoh u la ai khublei kyrpang ia baroh ki ophisar bad ki nongtrei jong ka Block Programme Management Unit , Mawkynrew Block bad kumjuh ruh ia ka World Vision India, East Khasi Hills kiba la trei borbah ban pynlong ia katei ka jingrakhe ia ka ASHA Divas 2017-18 kaba jop.
U Bah Banteidor u la ai khublei kyrpang ia ki Nongtrei ASHA ha ki Aganwadi Centre bapher bapher ha kaba u la pyniasyriem kum ki Nongkit Ktien Syiem kiba la trei shitom ban shimkhia ia kane ka bynta ban pyn sngewthuh paidbah ruh ia ka jingdon kam ka jingkoit jingkhiah, ka khuid ka suba bad khamtam eh na ka bynta jong ki Long kmie bad kumjuh ruh na ka bynta jong ki khyllung kiba dang dei ban khie ban san.
U Bah Banteidor u la ong ba u la ju ai lem ka kti ka mon ka kti kadiang ban iatreilang ryngkat bad kaWorld Vision India naduh u snem 2014 mynba u dang long tang kum u MDC bad kane kajuh ka mynsiem jong ka jing ia treilang kan nang iai bteng ban pynurlong ia kiba bun ki jing angnud ban ai ka jing shakri kaba bha tam na ka bynta ka jingbit jingbiang jong ki paidbah ha ka Mawkynrew Constituency bad ha ka jylla hi baroh kawei.
Ia ka jingialang ha katei ka sngi la pyniaid da I Kong G. Kurbah, Block Programme Manager, la ioh ia ka jingkren pdiang sngewbha na i Kong N. Shangpliang BPHN, la ioh ruh ia kajingkren na I Dr. J.B. Ranee, DMCHO East Khasi Hills bad kumjuh ruh na a i Dr. I.Syiem, Block Medical Officer Mawkynrew.
La ioh ruh ia ka jingialehkai Drama Lyngkot ia kaba la pynkhreh kyrpang da ki Nongtrei jong ka Jatah PHC bad kumjuh ruh ia ka Special Programme na ka liang jong ki Nongtrei jong ka Mawkynrew PHC, la ioh ruh ka jingkren lyngkot na I Bahrit Helen Kharumnuid bad ia ka jingkren ai khublei na u B.Nongkhlaw, World Vision India.
