Shillong, Jymmang 23: Ki jingjia ba khyllah khyllah kaba la jia khah khah ha kane ka ri jongngi ba la pyni bad ai dak lyngba ka jingsniew jong ki jingtei bapher bapher kiba don ha kylleng sawdong ka jylla Meghalaya ka la pyni ba kane ka synshar ka khadar kam i shngain satia hapoh ka jylla Meghalaya hapoh ka jingialam jong kane ka sorkar MDA ba la ialam da ka party NPP.
Ki jingjia ki la batai bad ai dak ne ai jingmaham lypa ruh ba lada ki nongialam jongngi kin dang iai mlien shi mlien ban shukor bein bad saitlah ia ki paidbah jingshisha baroh kin sa paw pyrthei da ki kambah kam san.
Ha kine ki ar ne lai snem tam mynta,ki jingjia ba lai phew jait ki iai jia man ka por ban ai dak lyngba ki bor mariang khlem kut shuh.Ki jing orpait ka jingkieng ha Duwar ksuid ha Shillong by-pass ka long kaba phylla shisha ba,katba nang syrdep katta ka nang orpait pynban.
Mynta pat sa ka jing orpait ka jingkieng Wah Umiam ha Domsite kaba la ai jingmaham lypa ter shi ter ia kane ka jingleh mynleh kane ka sorkar MDA ha Meghalaya ba ka dei ban tip bad pei shkor noh ban ia shwar ne pyrkhat pyrdain ioh lap ba dier pynban ka por.
Ka jing orpait ka jingkieng By-pass Mawlai ka la nang pynlyngngoh shuh shuh ia ki paidbah balei ka iai jia shi jia kumne. Ka jing orpait ka jingtei Inter State Bus Terminal (ISBT) ha Mawlai Mawiong dangshen ruh ka la nang pyn artatien shuh shuh ia ki riew pyrkhat riew pyrdain khamtam ba la ai dak da ki bor ba sha lyndet ban pyni ne maham lypa hynrei, ki bor pyrkhat briew pat lyngngai ki dang iai ioh thiah,ki briew kim lah kot bor satia ban pyrkhat.
Ki dang khein jem shi khein jem haduh mynta. Ka jingwan ther u lapbah lapsan ha kine ki bnai April-May mynta u snem 2022 khlem pat dei satia ka por slap ruh kat haduh ba la pyntwa bad dkut lut ki surok kali kylleng sawdong ki la long lypa ki dak ki shin kiba sniew bad ba ma shibun ia ka jylla jongngi.
Hynrei,kaba kham shyrkhei tam eh ka dei ka jingkhyllem syndon ka ing Dorbar bah ba dang shu tei thymmai ka jylla Meghalaya(Meghalaya Legislative Assembly) ha ka miet jing ka 21 tarik May 2022 ha New Shillong ia kaba ki nongialam kane ka sorkar MDA ki la kop sop lypa ba kin ioh pynlong Dorbar noh ha kane ka sien shong dorbar kaban sa wan( newAssembly Session).
Ban da dei ki Khasi hyndai,ki la wad ia ki daw na khmat u Blei bad lada dei ba ki la ia thok ia shukor shisha ne ia leh arsap arphong bein shisha ia ki Hok u paidbah bapli,ne leh bakla shisha,ki la dei ban pan map ha khmat U Blei namar kine ki nongialam mynta kim ju sngap shuh ia ka sur u briew.
Namar ba kim sngap shuh ia ka sur ba hok,ka sur ba shisha jong u briew, U Blei Um lah shah ban shu lehbein ne shukor kai katba mon da ki bor briew(man power).UBlei u ju kawang bad ai jingsneng na sha lyndet bad lada kim sngap ne dang iai kuman bad iai kop shuh shuh da ka jingsarong,ka jingjot ka la ap lypa ia ki, ha kaba u Blei un ai jingsneng kaba kham tyngeh ia ki.
Phi lah ban lehkai ia ki bor briew ha kane ka pyrthei hynrei, phim lah pat ban lehkai ia ki Bor jong U Blei Uba long U Bakhraw bad ba donbor tam na sha lyndet. Ki paidbah kidei pat ban husiar bha ha kum kine ki por ioh shu ngat ei ka apot kha-ma-kha khlem poi pyrkhat.
Ha ka por u Noah,u Blei u la pynshitom ia ki riewthok riew shukor baroh(too wicked people) namar Um sngewbha shuh ia ki ba kin shong kin sah ha kane ka pyrthei.Dang khadsan snem tam ei ei mynta,u Blei u la pynkhie da ka ‘Tsunami’ ha ki rud duriaw(beaches) namar ki kam sniew ba lai phew jait jong kito ki briew ba ki la leh ki bym i lah peit shuh ha kito ki jaka ha kito ki por.
Ha ri jongngi pat,donbok ba U Blei U dang ieit, U dang pyni dak shwa malu mala lyngba ki bor ka mariang bad lada ngi dang iai saitlah,u Blei un nym map satia.Kein noh ki kam thok kam shukor paidbah,kylla noh kaba mut ban ioh ka jingmap na U Blei shwa ban poi ka jingpynshitom ba khadduh jong U Blei iangi ha kane ka pyrthei.
