Shillong, Iaiong 29: ka Deputy Commissioner jong ka East Khasi Hills District kala pyntip ba ki dukan die lang baroh kiba la don kyrteng katkum ka list kaba la don kin plie ha ka shi tarik haduh ka lai tarik u bnai Jymmang naduh ka por 9.00 baje mynstep haduh ka por 4.00 baje jan miet tang kito kiba la don kyrteng.
Katkum kane ka hukum la shah tang ia kito ki dukan die khutia ha ki shnong kiba la don kyrteng kiba dei jong ka East Khasi Hills District bad kito ki dukan die khutia kiba la ithuh da ki Deputy Commissioner jong kito ki District.
Ki dukan kiba na kiwei ki District ki dei ban don ka jingpynshisha na ki Deputy Commissioner, kum ka East Jaintia Hills Distrct, West Jiantia Hills District, Ri Bhoi District, South West Khasi Hills District bad West Khasi Hills District.
Kito ki dukan baroh kiba la ioh jingbit na ki Deputy Commissioner kin wan tang ha ka sngi kaba la buh ia ki ban wan thied tiar. Ki dukan kiba la register bad ka tnad ri mard jong ka sorkar jylla kiba khlem don ha ka list ki lah ban plie ha kitei ki sngi ban dei ia ki jingbam jong ki jingri.
Ia ka jingthied bad kit ia ki mar ki matta kan long katkum ka jingpynbeit jong ki Executive Magistrates kiba don ha ki jaka. La kyntu ba kam dei ban don ka jingialum briew bad dei ban but ia ka jingpyniajngai kaba shimeter.
