Shillong, Kyllalyngkot 07: Ha ka lyngkhuh sngi dap snem (04.01.2018), ka KSU Dima Hasao District Unit ka la pynkup burom ia 12 ngut ki samla pule ka thain kiba wan sha khmat ha ki jingpule ki jong ki bad ha kajuh ka sngi la ioh ruh ban pynskhem ia ki nongkitkam ba thymmai ka District Unit ha Haflong.
Ka Dima Hasao District ka dei kawei ka ka district riewlum kaba don ha jylla Assam bad kaba don markhap bad u pud u sam ka West Jaintia Hills district. Ban poi sha kane ka district na Shillong hap iaid lyngba na Jowai, Shangpung, Raliang, Iooksi bad Saphai. Ka jingjngai jong ka headquarter jong kane ka district kata ka Haflong, na Shillong ka long 240 kilometers bad ka lynti ka long kaba sniew haduh katta katta. Lah ban iaid ruh lyngba na Guwahati hynrei ka jingjngai ka long haduh 400 kilometers.
Ka Dima Hasao District ka dei ka district ha kaba ki nongshong shnong ki kynthup ia ki hehpaid kum ki Dimasa, ki Zeme Naga, ki Hmar, ki Kuki bad ki rit paid kum ki Biate, Khasi, Karbi, Lushai, Hrangkhawl bad kiwei kiwei. Ki don ruh ki mynder kum ki Nepali, ki Bengali bad ki Bihari.
Ki Khasi kiba shong shnong ha kane ka district kiba don kumba 5000 ngut, bun kiba dei na Jaintia Hills bad ki shong shnong hapoh Jatinga, Bubon Hill, Harangajao, Umrongso, Haflong bad kumta ter ter. Ka Jatinga ka dei ka shnong kaba bun tam eh ki paid Khasi bad ka la ioh ruh ia la ka jong ka constituency ha ka Dima Hasao Autonomous Council. U member jong ka DHAC mynta na ka Jatinga constituency u dei u Ma Fleming Rupsi bad shwa ia u dei u ma Moril Massa.
Ki khasi ki la poi shong shnong sha kane ka thain naduh ki por ba ki syiem Sutnga ki la synshar ia kane ka jaka ha kaba ka jingiaknieh ia kane ka thain ka long hapdeng lai tylli ki hima ba radbah ka thain shatei lam mihngi, kata ka hima Ahom, ka hima Bodo-Kachari bad ka hima Sutnga. Hadien ka jingwan jong ki nong bilat bad haduh ba la ioh ia ka jylla Meghalaya, ki khun Khasi Khara kane ka district ki la long kum ki nongwei ha la ka jong ka jaka. Hynrei kane ka jingjngai jong ki na ki paradoh parasnam na Meghalaya kam shym la pynduh mynsiem ia ki ban ieid ia la ka jong ka riti ka dustur bad ia la ka Jaidbynriew.
Ki nongkitkam kiba mynta jong ka KSU Dima Hasao District Unit ki kynthup ia u samla Henry Dhar (President), u samla Archanki Suchiang (Vice President), u samla Belovedson Dome (General Secretary), ka samla Mebalari Tariang (Assistant General Secretary), ka samla Merika Suchen (Education Secretary), ka samla Staffy Massa (Finance cum Cultural Secretary), ka samla Monalisa Dhar (Organising Secretary), u samla Arkini Rupsi (Publicity Secretary) bad 22 ngut ki executive members.
La pyntian smai ia ki da u samla Donald V Thabah (General Secretary, KSU Central Executive Council) bad la ioh ruh ia ki jingkren na u samla Biangbor L Paliar ( Organising Secretary, KSU CEC), samla Iaikmenlang Lamare ( Executive member, KSU Jaintia Hill District Unit) bad i pastor Rimiki Dome. La ia don ryngkat ruh u samla Eric Nongkynrih ( dkhot KSU CEC), samla Reallystar Nongspung ( Environment & Cultural Secretary KSU CEC), samla Garland Manner ( Office Secretary, KSU JHDU) bad ki dkhot ka KSU Laskein Circl
