New Delhi, Jymmang 10: U Minister of Electronics & IT and Law bad Justice jong ka sorkar pdeng, Sh. Ravi Shankar Prasad mynta ka sngi u la ong na ka bynta ka sorkar India, ka jinglaitluid ki lad pathai khubor ka wanrah ka jingbha ha ka kam sain pyrthei kumbala ithuh da ka riti synshar ka ri India bad ia kane la ithuh da ka ain ha ki jingrai bapher bapher. Haba ai jingkren ha ka 15th Asia Media Summit mynta ka sngi, u Prasad u la ong ba ki lad pathai khubor ki don hok ban pyntip, ban pynsapriang bad ai jingmut. Hynrei watla ki long kiba laitluid hynrei hapoh ka riti synshar ki don pat ki kyndon kiba pyrkhing.
Halor ka jingpyndonkam bakla ia ki jinglum jingtip , u minister u la ong ba ka India kan ym ailad ia ka ri ban long ka jaka ba jyllei ka jingtuh ia ki jinglum jingtip, bad yn ym lah ban pyndonkam ia kine ki jingtip ban pynkylla ia ki jingmut jingpyrkhat jong ki briew ha kaba iadei bad ki elekshon.
U Prasad u la ong ba baroh ki kompani kiba iadei bad ki jinglum jingtip ki donkam ban sngewthuh ia la ka jingkitkhlieh kaba ki dei ban leh. U la ong ba ha ka por ba la mih ki kynrum kynram ba dang shen, ka sorkar ka la shim ia ka rai ba tyngeh halor kine ki jingeh. U Prasad u la ong shuh shuh ba ka jingdon jingkitkhlieh kadei ka bynta ba kongsan ha ka synshar paidbah bad baroh ki kynhun- naduh ka sorkar, ki nongbishar bad ki lad pathai khubor- kidei ban bud ia kane ka thymmei.
Haba kdew ia ka ri India ban kylla long ka jaka pdeng kaba khraw ha ka jinglum jingtip, u la ong ba donkam ban don ka jingiatreilang kaba dei halor ka jingdon ki jingtip, ka jingpyndonkam ia ka jingtip ba la ioh lum, ka jingkyntiew ia ka jingtip bad ka jingpynlong kyrpang ia ka jingtip ba la ioh lum. U la ong ba ka committee ba la khlieh da u nongbishar ba la shongthait jong ka Supreme Court ka dang bishar halor kine ki ishu bad shen ka sorkar kan sa pyntreikam ia ka ‘data protection law.’
Haba kren halor ka ishu jong ka Ethical Journalism, u Law Minister u la ong ba kadei ban long kaba khuid, kaba shisha, kaba shai bad kaba pynkup bor ia ki nongpule ia ki khubor. U minister u la ban ruh la ki lad pathai khubor mynta hapoh ka dur jong ka jingialam bakla ia ki nongpule, ki khubor ba ladep siew da ka pisa, ki khubor thok kidei ki bynta jong kane ka jingeh kaba khraw kaba donkam ia ka jingiatainia, la bynrap shuh shuh u minister.
Da kaba ai jingkyrshan ia ka thymmei jong ka jinglah tehlakam dalade (self-regulation) da ki lad pathai khubor, u Prasad u la ong ba ka IT act ka la pyni shai ba kano kano ka jingtip ba wan na kine baroh kam dei ban long kaba sniew, kam dei ban ktah ia ka suk ka sain ha ka ri bad kam dei ban ktah ia ki hok long trai.
U minister u la pynkynmaw ruh ba ka Supreme Court ka la ban bha ia ka jinglong kyrpang (privacy) kum kawei na ki Fundamental rights ha ka ri ka jong ngi. Hynrei u la bynrap ba kiba bamsap bad ki lehnoh kim lah ban rieh hadien kane ka hok jinglong kyrpang. U la ong ruh ba haba ialeh pyrshah ia ki kam lehnoh, ka jingpynsapriang ia ka jingsngewiapher kadei ban don ka jingiasngewthuh lang hapdeng ki ri kaba donkam ban pyntreikam noh mar mar.
Ha kaba iadei bad ki jingeh jong ka social media, u Prasad u la ong ba ka sorkar ka ialeh tyngeh ha ka jinglaitluid jong ki lad pathai khubor hynrei donkam ban pyniakhlad ia ka jingshisha na ka jingma. U la ong bun ha ka sorkar mynta ki iakhun pyrshah ia ka jingeh ha kaba la khniot noh ia ka jinglaitluid. U minister u la ong ba ka sorkar ka burom iaka lad pathai khubor internet (social media) namar ka pynkup bor ia ki riewpaidbah hynrei ka ktien kaba ki pyndonkam ha kane ka rynsan ka wanrah ka ia ka jingsngewkhia.
U Prasad u la ong shuh shuh ba ka internet kam lah ban long ka atiar jong ka neo-imperialism. Haba kdew sha ka internet kum kawei na ki jingthaw ba biang tam da ka jingstad jong u briew, u la ong kam lah ban long ban tehlakam tang da katto katne ngut. U la ong ba lada ka Internet kan hap long salonsar, kadei ban don ka jingiadei bad ki buit bad kolshor jong ka thain.
Kiwei pat ki kynrem ki lyndan kiba la iadonlang ha kane ka sngi kiba la ai ia la ki jong ki jingsngew halor ka Media Regulation ki long u H.E. Mr. Hasanul Haq Inu, Minister of Information, Bangladesh, H.E. Dr. Khieu Kanharith, Minister of Information, Cambodia, Mr. Sam Seog Ko, Standing Commissioner, Communication Commission, Republic of Korea bad Justice C.K. Prasad, Chairman Press Council of India. Ia ka jingialang la pyniaid da u Dr. Venkat Iyer, Barrister, UK.
Ha baroh ki jingkren, ka la don ka jingmynjur halor ki ishu ba kynthup ka jingpynthikna ia ka jinglaitluid ban pynpaw ia la ki jingsngew bad ka jingkiew ha ka lad pathai khubor, da kaba burom ia ka jinglong kyrpang. Ha kajuh ka por, baroh ki nongkren ki la kren shaphang ka jingeh ha kaba iadei bad ki khubor thok bad ka jingpyndonkam ia ki bor internet ban leh ia ki kam beain lyngba ka bor internet.
Ki nongkren ki la kdew ruh ia ki jingeh jong ka jinglong kyrpang ki cyber bad ka jingpynkhein ia ka hok longtrai bad la rai ban tehlakam ia kine ki jingeh lyngba ka jingiakren hapdeng ki ri bapher bapher.
