Shillong, Nailur 19: Baroh ki MLA Khasi Jaintia Garo kynthup ki ar MP ki dei ban hiar Delhi ban dawa hakhmat Parliament ban pynrung noh ia ka ktien khasi hapoh ka khyrngit baphra jong ka konstitution jong ka Ri.
Ka Dorbar Ki Khlieh Nongsyshar ka ri Hynniewtrep ka kyntu ia baroh ki Khun khun ki hajar kynthup ki Nongsynshar, ki nongkitkam na ki naduh Dorbar Kur, Dorbar Shnong, Dorbar Raid, bad haduh Dorbar Hima ban ia mih rynthih bad ban poi sha Ka jingiaid bad jingialang paidbah ha Ka 22 tarik mynta u bnai ban ia mih paidbah hapoh Madan Iewrynghep, Laitumkhrah ha Ka por 11 baje mynstep bad nangto Kan long Ka jingiaid paidbah lyngba Ka surok St. Edmunds college haduh Madan malki Shillong bad yn bteng Ka jingialang paidbah naduh Ka 12 baje shiteng sngi haduh 2baje janmiet .
Ka jingthmu Ka long ban kyrshan ia ki jingdawa ba la lam khmat da ka kynhun KHASI AUTHORS SOCIETY da kaba pynpaw paidbah ia Ka jingieid Jong ngi ia la Ka Jong Ka ktien bad ban dawa na Ka sorkar jylla bad sorkar pdeng ban shim khia ban pynrung noh ia Ka ktien khasi ha Ka khyrnit baphra Ka Riti synshar Ka Ri India.
Khyndiat kum ban shu bynrap ka long shishi kaba sngewsih ba ka ktien Bodo ka ioh ban rung (1) Assamese, (2) Bengali, (3) Gujarati, (4) Hindi, (5) Kannada, (6) Kashmiri, (7) Konkani, (8) Malayalam, (9) Manipuri, (10) Marathi, (11) Nepali, (12) Oriya, (13) Punjabi, (14) Sanskrit, (15) Sindhi, (16) Tamil, (17) Telugu, (18) Urdu (19) Bodo, (20) Santhali, (21) Maithili and (22) Dogri.
Ki don kumba 38 tylli ki jaid ktien kiba paw mynshwa ha ki kot jong ka Ministry of Home Affairs, Sorkar India, kiba la dawa ban pynrung hapoh ka khyrnit baphra jong ka Constitution Ri India (Eighth Schedule to the Constitution). kita ki long, (1) Angika, (2) Banjara, (3) Bazika, (4) Bhojpuri, (5) Bhoti, (6) Bhotia, (7) Bundelkhandi (8) Chhattisgarhi, (9) Dhatki, (10) English, (11) Garhwali (Pahari), (12) Gondi, (13) Gujjar/Gujjari (14) Ho, (15) Kachachhi, (16) Kamtapuri, (17) Karbi, (18) Khasi, (19) Kodava (Coorg), (20) Kok Barak, (21) Kumaoni (Pahari), (22) Kurak, (23) Kurmali, (24) Lepcha, (25) Limbu, (26) Mizo (Lushai), (27) Magahi, (28) Mundari, (29) Nagpuri, (30) Nicobarese, (31) Pahari (Himachali), (32) Pali, (33) Rajasthani, (34) Sambalpuri/Kosali, (35) Shaurseni (Prakrit), (36) Siraiki, (37) Tenyidi and (38) Tulu. Mynta ngi iohjingtip ba ka jingdawa ban ithuh ia ki ktien ka la kiew haduh 42 tylli ban pynrung ha katei ka khyrnit ka baphra jong ka constitution.
La kyntu jur ia ki 36 ngut ki MLA kynthup ki 24 ngut ki MLA garo kynthup ki MP arngut ban ieng rangbah bad ban lam khmat bad leit pynpaw ialade hakhmat ka Dorbar Parliament Ri India ban dawa tyngeh halor kane ka phang.
Ka long shisha ka jingleh shiliang ka Ministry of Home Affairs Sorkar India ha u snem 2003, ban pynrung khamtam ia ka kyntien Bodo tang ban tem ia ki jingiaumsnam hapoh Assam lyngba ka The Constitution (Ninety-second Amendment) Act, 2003, kaba la pynrung bad mynjur hapoh Lok Sabha ha ka 18 August 2003, kum ka the Constitution (One-hundredth Amendment) Bill, 2003 (Bill No. 63 of 2003) kaban kynthup bad bsuh ia ka ktien Bodo, Dogri, Maithili bad Santhali hapoh ka khyrnit ka baphra.
La kyntu jur ia phi bad ki Dorbar ha baroh ki kyrdan ban shim khia ban ia mih paidbah bad ban iawer ia ki samla, longkmie bad rangbah ka Kur, Shnong, Raid bad Hima jong phi sha kane ka jingiakynduh ba kyrpang jong ka jaidbynriew Khasi ba la pynbeit da ka Khasi Authors Society. Tylli ngin ieng sapret ngin kyllon.
