Shillong, Naiwieng 17: U myntri rangbah jong ka jylla u Dr Mukul Sangma mynta ka sngi u la pynbna ba ka sorkar kala pdiang ban pyntrei kam noh ia ka tulop thymmai jong ki nongtrei sorkar jylla bad ia ka tulop kaba thymmai ki nongtrei sorkar kin ioh noh naduh u bnai Nohprah 2017.
Haba kren ha ki nongthoh khubor mynta ka meit ha dien ba la wai ka jingialang jong ka kabinet, u myntri rangbah la ong ba kane ka tulop thymmai kan trei kam naduh ka 01St Kyllalyngkot 2017. Haba ia dei bad ka arrears ka jingsiew kan long 40% ha ka jingsiew kaba nyngkong bad ia kaba sah 60 % yn sniew ha ki ar tylli ki snem mang tyngka 2018 bad u snem 2019.
U myntri rangbah u la ong ba ia kiwei ki jingsiew kiba la tip kum ka “allowances”, ia ka Winter Allowances la pynkiew na ka T.400 tyngka sha ka T.600 tyngka, ia ka Hills Allowances na ka T.300 tyngka la pynkiew sha ka T.500 tyngka, ia ka Daily allowances ka sorkar jylla kan but ia ka jong ka sorkar pdeng, ia ka medical allowances la pynkiew na ka T.700 tyngka sha ka T. 1000 tyngka.
Haba ia dei bad ka baiwai iing, ha ki jaka ba la niew ba la dei ki jaka sor ia kabai wai iing la pynkiew na ka T.4000 sha ka T.8000 tyngka, ia kiba dei hapoh jong ki District headquarter na ka T.3000 tyngka sha ka T.6000 tyngka bad iakiwei pat na ka T.2500 tyngka sha ka T.5000 tyngka.
Na ka bynta ki long kmie ki ban ioh khyllung pat la pynkiew ia ka shuti jong ki na ka 120 sngi sha ka 180 sngi bad ha kane ka kynti kaba mynta la shah ia u kpa jong ka iing ruh ba un shim shuti 15 sngi haba ka kurim ka ioh khunlung. Ki don bun kiwei kiwei ruh ki jingpynkiew kaba ka kabinet mynta ka sngi kala pdiang ha kaba pyntrei kam ia kane ka tulop kaba thymmai jong ka sorkar ia kaba la tip kum ka Fifth Pay Commission. Ka jingkiew na ka tulop ka long 226 percent.
U Myntri rangbah u la ong ba da kane ka jingpyntrei kam thymmai ia ka tulop jong ki nongtrei sorkar, ka jinglut ka sorkar ka hap ban sei pisa tam ka long T.929 klur tyngka. Kane kan long na ka bynta ka tulop thymmai, ka jingkiew ha kaba siew ia ka bai bam tynmen jong ki nongtrei sorkar bad ka ia ka 40 % ka Arrears .
