Ki seng riewlum kidei ban weng jingkyrshan noh na ka MDA ba ialam ka NPP: FKJGP

Shillong, Nohprah 11:Ka Federation of Khasi Jaintia and Garo Peoples kala dawa na ki seng riewlum ba kidei ban weng jingkyrshan noh na ka sorkar MDA kaba la ialam da ka National Peoples Party (NPP) namar ba kane ka seng kala thok la shukor ia u paidbah ka jylla da kaba kyrshan iaka CAB ha Lok Sabha.

“Ki sengbhalang ryngkat bad ka sorkar jylla kila aiti iaka dorkhas bad pynpaw hakhmat u Amit Shah ba ki pyrshah jur iaka CAB, hynrei ka jingkyrshan ka NPP iaka CAB ha Lok Sabha kadei ka jingthok kaba khraw tam bad ngi dawa na ki seng riewlum kiba kynthup iaka UDP, HSPDP, PDF bad KHNAM ba kidei ban weng jingkyrshan noh mardor na ka sorkar MDA kaba la ialam da ka NPP” ong u Vice President ka FKJGP u Bah Eldie Newton Lyngdoh hadien bala wai ka jingialang jong ka Central Executive Committee jong ka FKJGP kaba la long hynne ka janmiet.

U Bah Eldie u la ong, ba ula kren hakhmat u Amit Shah ba dei ban ieh iaka jylla Meghalaya kumba ka long bad ba ka donkam ban ioh iaka jingiada, hynrei ym lah pat ban sngewthuh ba u Conrad Sangma u ong ba dei ban pyrshah iaka CAB bad na ka liang u Bah Prestone Tynsong ruh ula ong ba yn phah iaka MP ka NPP ban pyrshah hynrei ka Agatha kaba dei ka para ka jongu Conrad Sangma pat hapoh Parliament kala ai jingkyrshan iaka CAB bad kane kadei ka jingthok kaba khraw tam hapoh ka jingialam u Conrad.

U la ong, ka jingkren ka MP na Tura ka Agatha Sangma na ka NPP ba ka ai jingkyrshan iaka CAB bad ka ai khublei ia u Amit Shah kadei ka jingthok bad jingshukor ia u paidbah ka jylla kiba pyrshah jur iaka CAB.

“La da ki seng riewlum ki dang ia tyllun bad ka NPP wat haba kila tip ba kila shah shet ha u Conrad Sangma lyngba ka MP ka NPP bad ka FKJGP kan nym khein seng riewlum shuh ia ki lada kim lah ban ieng tylli lang kawei hynrei kan pynlong iaka jingiakhih ban pyrshah ia baroh ki seng riewlum bad kane kadei ka por kaba biang tam ba ki seng riewlum kin kyndit bynriew noh” ong u Bah Eldie.

“Mynshwa ngi lah shah shet ha u Dr Mukul Sangma namar u la ong ba ym lah ban leh iaka ILP namar ba ka Parliament kan nym ai jingmynjur hynrei mynta ka Parliament kala ai jingmynjur ban pyntreikam iaka ILP ha Manipur, kumta ngin mih biang ban dawa pyntreikam iaka ILP ha ka jylla”ong u Bah Eldie Newton Lyngdoh ryngkat bad ka ong, “Ngi dawa iaka sorkar ba kadei ban pynlong iaka dorbar kyrpang ne special session ba kadei ban ai jingmynjur ban pyntreikam iaka ILP ha ka jylla”.

U la ong, ka BJP ka mut ban leh arsap khnang ba ki sengbhalang kin nym ioh ban pynlong iaka jingiakhih namar ba ki paidbah ka jylla kin rakhe iaka Khristmas bad ia u Snem Thymmai, hynrei ka FKJGP kam banse ban pynlong beit iaki jingiakhih bad kan nym shaniah hi ruh ia kane ka sorkar kaba ialam da u Conrad Sangma uba la thok pyrshah ia ka jaidbynriew bad ialam bakla iaka sorkar.

What Next?

Recent Articles

Leave a Reply

Submit Comment

*