Shillong, Risaw 24: Ka jingialang paidbah kaba la khot da ka Meghalaya People Committee On Aadhaar (MPCA) kaba la long mynta ka sngi ha Khasi National Dorbar Hall, ha Mawkar ha dien ka jingiamir jingmut kaba la neh kumba lai kynta shiteng kala shim ia kawei ka rai ban pynlong ia ka “All Out Movement on Aadhaar” ia kaba kin sa sdang ha ka 30 tarik mynta u bnai ha Shillong.
Haba kren ha ki nongthoh khubor ha dien jong ka jingialang paidbah, u Rev PBM Basaiawmoit, u la ong ba la pynbeit ba kino kini ki briew kiba la don ia u Aadhaar lada ki kwah ban weng noh ia lade ki lah ban ai ia ka jingthoh sha ka ophis jong ka KSU ha ka 30 tarik mynta u bnai, kiba kwah ban leh ia kane ki lah ban leit ai naduh ka por 11 baje mynstep haduh ka por 3 baje noh phai sngi.
Namar ba ka la dei ka Ain, na ka liang jong ka MPCA, kan lum ia kine ki kyrteng bad phah sha ka ophis jong ka UIDAI, namar dei ma ka kaba peit ia kane ka kam, lada ka lah ban weng noh ia kito kiba kwah ban weng noh ia lade na ka jingdon ia u Aadhaar Card. Lada don kino kino kiba shah pynbor ki dei ban pan da ka jingthoh bad ai sha ka MPCA ba kin leh ia kaba ka don kam. Namar khlem jingthoh yn nym lah ban leh ei ei.
Ha kane ka jingialang kaba la long mynta ka sngi bun ka ki nongkren kila pynsngew ia ka jingsniew kaba lah ban mih na ka jingdon ia u Aadhar bad ha ka juh ka por la kyrpang ia ka sorkar ba kam dei ban pynbor ia ki briew ba kin shim ia u Aadhaar hynrei ai kan long ha ka mon jong u ne ka briew shimet lada ki kwah ne em ban don ia u Aadhaar.
Ha ka jingialang la pynlong ruh ia ka jingduwai na ka bynta ki nongbishar ba don burom jong ka iing bishar kaba ha khliehduh jong ka Ri India ba kin lah ban ai ia ka rai ha kaba ia dei bad u Aadhaar na ka bynta ka jingbit jingbiang jong ki paidbah ka Ri hi baroh kawei.
