Shillong, Risaw 15: U myntri ba rim jong ka sorkar Meghalaya u Bah Herbert Suchiang u la khlad noh mynta ka sngi ha dien ka jingpang kaba la bat ia u katto katne por. U Bah Suchiang u la jop ia ka MLA election ha ka 4th Raliang Assembly Constituency ha u snem 1988 na ka seng Congress.
U Bah Herbert u la jop ruh ia ka MDC Election hapoh jong ka JHADC bad u la shah jied ruh ban long u CEM jong ka JHADC ha ka 22 Lber 1999 bad u la neh ha kane ka kam haduh ka 27th Naitung 1999. Ha kane ka juh ka iing dorbar u la shah jied ruh kum u Chairman jong ka JHADC ha ka 23rd Kyllalyngkot 2001.
Shuwa ba un rung sha ka kam sain pyrthei u Bah Herbert Suchiang u la long u dkhot jong ka ‘Indian Audit and Accounts Services’ ha dien ba u la rung sha ka sian pyrthei bad jop ia ka election u la ioh ban long kum u myntri kabinet hapoh jong ka sorkar kaba la ialam da u Bah DD Lapang kum u myntri rangbah.
