Shillong, Iaiong 23: Ki nongialam jong ka seng KSU jong ka South West Khasi Hills District bad jong ka Rangthong Unit mynta ka sngi kila leit ban ia kynduh ia u Bah Pynshngianglang Syiem CEM jong ka KHADC bad ia u EM ba dei peit ia ka khyndew ka shyiap u Bah Hedrian Lyngdoh.
Haba kren ha ki nongthoh khubor ha dien jong kane ka jingiakynduh bad ki bor jong ka KHADC, u Samla Forwardman Nongrem President jong ka KSU ba dei peit ia ka SWKH District, u la ong ba ka seng kan pynthikna ba ki shipai BSF kim dei ban ioh jaka ba buh ktem ha SWKH District.
La iathuh ba kane ka jingiakynduh ia ki heh jong ka KHADC ka long ban dawa na ki bor jong ka District Council ba kam dei ban ai ia ka jingmynjur jong ka ha kaba ia dei bad ka ia die ia thied jaka hapoh shnong Rangthong da ki bor shipai.
Na kane ka jingiakynduh na ka liang jong u Bah PN Syiem CEM bad u Bah Hedrian Lyngdoh Em ba dei peit ia ka khyndew ka shyiap kila ai ka jingkular ia ka KSU ba na ka liang jong ka ophis kin nym ai jingbit bad kila iathuh ia ki nongialam jong ka KSU ba ka ophis kala pynmih ia ka jingpynbna paidbah ba kano nym don kano kano ka jingiadei ia thied khlem ka jingbit na ka District Council.
U samla Nongrem u la ong ba kane ka jaka ba ki shipai BSF ki mut ban shim ka dei ka jaka jong ki ar kur, ka kur Syiemlieh sawkpoh bad jong ka kur Sanglein, na ka liang jong ka KSU ka kyntu ia kitei ki ar tylli ki kur ba kimd ei ban die jaka sha ki shipai bad haka juh ka por la kyntu ia ki agent ba kim dei ban wad jaka na ka bynta ki shipai BSF.
Ka jingsheptieng jong ki paidbah ka thain ka long ba kila dep iohi ia kaei kaba la jia ha ki jaka ba don ki shipai kum ka Rangmen ha Ri Bhoi District, ha Umpling bad ha Laitkor, kane kan jia kajuh ia ki paidbah jongka SWKH District lada ki shipai ki ioh jaka. Na ka liang jong ka KSU ka kylli ruh ba lei ki shipai ki kwah jaka haba don ki riew paidbah.
Ka KSU ka kyntu ruh ia ki bor jong ka District khamtam eh ia ka Deputy Commissioner kaba mynta ba kam dei ban ktah ha kaba ia dei bad ki jaka puta ba mut ban die sha ki shipai BSF. Halor kane ka seng kan sa khot ia ka jingialang paidbah ban pynsngewthuh ia ka jingma lada don ka ktem shipai la ong u samla Nongrem.
