Shillong, Jymmang 27: U Myntri rangbah ka jylla u Conrad K Sangma ha ka jingkren jong u ha ka jingialang pynkup burom ia u da ka dorbar shnong Rymbai kaba hap hapoh jong ka East Jiantia Hills District u la kubur ba hapoh jong ka District kam don ka college sorkar.
Ha ka jingkren jong u myntri rangbah u la pynpaw ia ka jingsngewkhia ka jong u ia ka rukom pyntrei kam ia ki skhim jong ka sorkar na ka bynta ka jingmyntoi jong ki paidbah ba ki khlem poi hok sha ki paidbah ha ki nongkyndong.
U la ong ba ka thong kaba ha khmat eh jong ka sorkar kaba mynta ka long ba ka sorkar kan pynthikna ba ia ki kam pynroi baroh kiba la pyntrei kam da ka sorkar, ka sorkar kan bud dien ia ki ban peit ba ka poi sha ki paidbah.
Ha la liang ka pule puthi u myntri rangbah u la ong ba ka jingnang jingstad ka long kaba don kam ia baroh, u la ong “Ngi don kam ia ki surok, ka Um kiwei ki kam pynroi kum ki jaka ai jingsumar hynrei lada ngin don ia ki jaka pule kiba biang ngin nym lah ban rah ia ka jylla Meghalaya ha ki kyrdan kiba kham sha jrong”.
Ha kane ka jingialang paidbah u myntri rangbah u la kubur ba ka East Jiantia Hills District kam don ia ka College sorkar, lane ia ki Higher Secondary School kiba dei jong ka sorkar. Na ka liang jong u myntri rangbah u la ong ba ka sorkar kan sa peit kumno ban pynbha ia ka pule puthi ha kane ka thain, u la ong ba ka sorkar ka dang pynkhreh ban pyntrei kam ia ki Community College ha baroh kawei ka jylla, u la ong.
Haba kren halor kilad ki lynti kumno ban kyntiew ia ka ioh ka kot jong ki paidbah ka jylla, u la ong ba ka sorkar kan wad ki lad ki lynti baroh ban wanrah ia ka jingpynkylla ha ka liang jong ka pule puthi.
Haba ia dei bad ka jingkhang jong ka NGT ia ka kam tih dewiong, u la ong ba ka sorkar mar ia shimti kala ia kren bad ka sorkar pdeng ha kaba ia dei bad kane ka jingeh kaba ki paidbah ki ia kynduh bad kala wad ki lad ki lynti kuno ban weng ia kane ka jingeh. Kaei kaba ka sorkar ka dang pynkhreh mynta ka long ban wad ia ki lad ki lynti ba kan nym ktah ia ka ioh ka kot bad ha ka juh ka por ban nym ktah ia ka mariang.
U la ong ba kane ka kam tih dewiong kan nym neh baroh shirta, ka pork an poi ba un sa lut noh, u la kyntu ba ki briew ki dei ban wad ki lad ki lynti kumno ban trei da kiwei ki kam ba kata ka jingtrei kaba lah ban neh lyngba ka rep ka riang bad ki kam jongohkai pyrthei. U la kyntu ia ki samla ba kin long ki nongwanrah ia ka jingkylla na ka bynta ban kyntiew ia ka ioh ka kot jong ka jylla.
Ha shuwa jong kane ka jingialang paidbah u myntri rangbah u la leit ban jngoh ia ka tyllong um jong ka shnong Rymbai bad ia ka Rymbai Government Secondary School kaba dei tang kane ka skul sorkar ha baroh kawei jong ka District.
Ia u myntri rangbah ha kane ka sngi la synrang lang da u Myntri ba dei peit ia ki kam khyndew u Bah Kyrmen Shylla, u myntri ba dei peit ia ki kam pule puthi u Bah Lahkmen Rymbui, u MLA jong ka Mokaiaw u bah Nujorki Syngoh, u Rakkam A Sangma MLA jong ka Rongra Siju, u MLA ka Jowai u Bah Wailadmiki Shylla bad kiwei ki heh sorkar.
Ha kane ka sngi na ka liang jong ka dorbar shnong jong ka Rymbai ha ka jingpynkup burom ia u myntri rangbah ka jylla, kala ai sngewbha sha u Conrad K Sangma da ka dur mot jong u kpa jong u u Purno K Sangma bam kwai ha dwar u blei ia kaba la shna kyrpang ban kynmaw burom ia u tei u nongialam ka jylla.
