Shillong, Lber 14: Ka Khasi Students’ Union War Jaintia Circle da ka mynsiem kaba sngewkhia kam lah ban shu shong kli kti namar ka jingkit jingleh beain jong ki truck ba shalan maw shapoh Bangladesh kaba long sha palat u pud jong ka khaii ka pateng.
Ka Seng ka la lap ha shilynter jong ka Surok khamtam hadien ba la dep thew na Weighbridge kaba don ha Sohkha hynrei la shu kit palat pud kane ka jingleh jong ki truck ka buh jingma ia ka leit ka wan ki paidbah bad ka pynsniew kloi ia ka surok NH-40. Ka Seng kam sngewthuh balei na ka liang katei ka Weighbridge kam shym la phah pynhap ia kito ki truck ba kit tam ia ki maw, lada ka long kumne bha ban pynduh noh ia katei ka Weighbridge hangtei hapoh Sohkha da ka bor Sorkar.
Katei ka Weighbridge ka dei ban thew katkum ka jingthew ba la buh ka Sorkar khnang ba kan ym ktah ia ka surok bad ka leit ka wan ki paidbah ruh kan ym shong syier. Ka Seng ka kyntu jur ia ki bor ba dei peit ba kin leit jurip mar mar khnang ba kin ym ioh ban leh katba ki mon.
