Shillong, Rymphang 22: u Director jong ka Khadi Village Industries Commission (KVIC) u V S Bagul u la ong ba ka daw jong ka jinghiar ha kaba pyntrei kam ia ka skhim PMEGP hapoh ka jylla Meghalaya dei na ka daw bym biang ka internet.
Haba kren ha ki nongthoh khubor mynta ka sngi la ong ba kane ka skhim ka trei kam bha ha kiwei ki jylla na ka bynta ban iarap ia ki samla khamtam ha ki nongkyndong ba kin seng iala ki jong ki kam ki jam ban ieng hala ki jong ki kjat.
La ong ba shuwa ba kane ka jingapply online ia ki phom kan trei kam, kane ka skhim hapoh ka jylla Meghalaya ka trei kam bha, hynrei hadien ba la pyndon kam da ka online kane ka skhim kala hiar bha ha kane ka jylla bad ha u snem 2018 kala long tang 8%.
Na ka liang jong ka KVIC ka kyntu ia ki samla ba kin wan sha khmat ban aply ia kane ka skhim jong ka sorkar pdeng ban seng kam la jong namar ka don ka jingiarap pisa 35% ha ki nongkyndong na ka jinglut jong ka kam kaba u ne ka ki seng bad ha ki jaka sor ka long tang 25%.
Haba jubab ia ki jingkylli u Bah H Marbaniang CEO jong ka MKVIB, u la ong ba ka jingjied ia ki briew ban ioh ia kane ka skhim ka long katkum ka kam kaba ki nongapply ki kwah ban seng ia ka kam bad ia kane la juh jied ia ki briew lyngba ka ophis jong u Deputy Commissioner.
U heh jong ka SBI u G Bijoy Kunar, u la ong ba ka jingeh ka long ba bun sien hadien ba la sangtion ia ki skhim ki don ki samla kiba kim treh shuh ruh ban shim bad ka jingbym lah jong ki Bank ban sangtion ka dei namar ki skhim ki biang. Kane ka jingkhot ia kane ka jingiakynduh bad ki nongthoh khubor mynta ka sngi la long ba kyntu ia ki samla kane ka jylla ba kin wan shakhmat ban shim ia kane ka kabu ban ioh bai seng ia ka kam kaba ki kwah ban trei.
