Shillong,Nailar 25: Ki seng bhalang na South Garo Hills kiba kynthup ia ka GSU, AAYF bad ka ADE, kila leit ban ia kynduh ia u C Purkuyastha General Manager jong ka SBI ha Guwahati,u ba dei peit ia ka jylla Meghalaya ha ka sngi palei ban ia kren halor ki jigneh jong ka SBI Branch kaba don ha Baghmara bad ban plie biang ia ka SBI ha Rongra.
Ha kane ka jingiakynduh na ka liang jong kitei ki lai tylli ki seng bhalang kila ai ia ka dorkhas sha u tei u heh jong ka SBI, ha kane ka dorkhas kila pynia ia ki jingeh bad ha ka juh ka por kila ai jingmut ruhkumno banweng ia kine ki jingeh kaba ka SBI Baghmara ka ia kynduh.
Na ka liang jong kitei ki seng bhalang kila kyntu ia u GM ba ka SBI ka dei ban buh kham bun ki ATM ha Baghmara, Ban pynbiang ia ka pisa hapoh ka Bank, ban buh noh ia ka mashimthep pisa bad ka internet ka dei ban biang hapoh Bank. Ha ka juh ka por ba kan pynsuk ia ka jingplie ia ki Bank Account kiba thymmai.
Ha kane ka jingiakynduh kila kyntu ruh ia u GM ban plie biang ia ka shnat jong ka SBI kaba la don mynshuwa ha Rongra ia kaba la khang noh ia ka na kiba bun kid aw hynrei kumba ka long mynta ka shong suk shong sain kala wan biang bad ki kyrpad ia ka bank ban plie biangnoh ia kane ka SBI Branch ha Rongra.
Halor kitei ki jingeh kaba ki nongialam jong ki seng bhalang na South Garo Hills kila pynsngew sha u tei u heh jong ka SBI u ba dei peit ia ka jylla Meghalaya na ka liang jongu Purkuyastha u la ong ba kine ki jingeh kaba ki ia kynduh ki long kiba dei shisha bad na ka liang jong u un sa ialeh katba lah ban pynbiang noh ia ki jingdon kam kham kloi.
