Shillong, Kyllalyngkot 11: ka party UDP mynta ka sngi kala sdang ban ialap na ka bynta ka MLA Election ka ban long shen ha ka jylla da ka jingialang paidbah ha Madan Malki ha kaba palat phew hajar ki nongkyrshan ka UDP kila ia poi sha kane ka jingialang paidbah.
Ha ka jingkren jong u president ka seng u Dr Donkupar Roy u la ong ba u ai ka jingkit bok ia baroh 7 ngut ki MLA jong ka party ba kin jop biang bad kum juh ia baroh ki kyrtong jong ka party UDP ba kin jop ba kin ioh ia ka jingsynshar ha ka jylla ha dien ka MLA Election.
Kum u president jong ka party u la kyntu ia ki nongkyrshan jong ka party ba kin long kiba “Iaineh” ban wanrah ia ka jingjop. U la kyntu ruh ia ki para dkhot jong ka party ba kin long kiba ia trei shitom ha kine ki sngi kiba dang sah. Ha kane ka sngi la pynbna paidbah ruh ba ka party ha kane ka kynti kaba mynta ka pynieng 34 ngut ki kyrtong na ka UDP.
Haba phai sha garo Hills ka UDP mynta kan pynieng 12 ngut ki kyrtong MLA bad ka GNC kan pynieng 5 ngut ki kyrtong MLA. Na ka liang jong u nongialam ka UDP u Dr Donkupar u don ka jingkyrmen ba ki seng riewlum ki lah ban thaw ia ka sorkar khlem da ia khleh bad kiwei.
Kiwei kiba la kren ha kane ka jingialang paidbah jong ka party UDP, ki long u bah Embhlang Syiemlieh, bah Titosstarwell chyne, bah Metbah Lyngdoh, bah Moonlight Pariat, u utpal Areng, bah Paul Lyngdoh, u Dr Jemino Mawthoh bah Donbok Khymdeit bad bah Bindo M Lanong u ba la pyniaid ruh ia ka jingialang.
Ha ka jingkren kine ki nongialam jong ka seng UDP baroh kila pynpaw ba ki don ka jingkyrmen ba ha kane ka kynti kaba mynta kan dei ka pali jong ki seng riewlum ban thaw ia ka sorkar da ka jingiatrei lang ha pdeng ki lai tylli ki party ka UDP, HSPDP bad ka GNC.
