Shillong, Naiwieng 23: Ka kynhun ki nongniah thuk thuk kaba la tip kum ka India@75 BRO Motorcycle Expedition ka la ioh ia ka jingpdiang sngewbha mynta ka sngi ha Shillong, Meghalaya.
U Sunil Kumar Choubey, SE (Civ), Officiating Chief Engineer, HQ R&D Estt (BRO) u la pdiang sngewbha ia kane ka kynhun ki nongniah thuk thuk kiba la poi ha Meghalaya ha HQ R&D Estt (BRO) Shillong mynta ka sngi.
Ka Border Roads Organisation (BRO) ka dang pynlong ia ka India@75 BRO Motorcycle expedition kaba la sdang naduh ka 14 tarik u Risaw bad ka ban kut ha ka 27 tarik u Nohprah 2021 ka ban iaid sha kylleng ka ri ban ai jingtip shaphang ki kam jong ka BRO ha ka jingkyntiew ia ka ri kum shi bynta ka jingrakhe ia ka Azadi Ka Amrit Mahotsav.
Ia kane ka jingniah thuk thuk la pynlong ha ka 7 bynta. Ia ka jingleit sha ka jylla Meghalaya la pynlong ha ka bynta kaba 4 kaba la sdang na Doomdooma kaba don ha Arunachal Pradesh ha ka 16 tarik u Naiwieng 2021 bad ka ban kut ha Kolkata ha ka 26 tarik u Naiwieng 2021.
U Myntri Sorkar Pdeng ba dei khmih ia ka tnat Defence, u Rajnath Singh u la pyllait ia kane ka jingniah thuk thuk na Delhi ha ka 14 tarik u Risaw, 2021. Kane ka dei ka sien kaba nyngkong ba kum kane ka jingniah thuk thuk kan iaid haduh 20,000 kms ha ki 75 sngi bad ha kane 75 ngut ki nongniah thuk thuk kiba kynthup ia ki ophisar bad kiwei kiwei kidei ki nongtrei ka BRO. Kane ka jingniah thuk thuk kan kut ha New Delhi ha ka 27 tarik u Nohprah 2021 hadien ba ka la poi sha baroh ki thain khappud jong ka ri India.
Kum shi bynta jong ka prokram ai jingtip ba la pynlong da ka HQ R&D Estt, kane ka kynhun ka la leit jngoh ia ka Saint Claret Higher Secondary School, Umkdait, Nongmengsong, Shillong bad la pdiang burom da u Principal Fr. Siby Kuriakose.
Ki nonghikai bad ki khynnah skul kiba la ioh ka jingsyllok na kine ki nongniah thuk thuk shaphang ka jingdonkam ia ka jingiatylli ha ka ri bad ruh shaphang ki kam ka roi ka par ha ki jaka kyndong tam jong ka ri, khamtam ha ka thain Shatei bad ka thain shatei lammihngi jong ka ri.
Kane ka jingniah thuk thuk ka don ia ki phang kiba iadei bad ka jingiada jong ka ri bad ruh kaba iadei bad ka imlang sahlang. Ka thmu ban ai mynsiem ia ki samla ba kin rung kam ha ka BRO bad ruh ban ioh lad ban iakren bad kito kiba lah ioh khusnam na ka bynta ka jingshlur.
Ki shipai ba la shongthait bad ki longkmie kiba la duh noh ia ki lok jong ki ha ka jingiada ia ka ri. Ka thmu ruh ban ai jingtip shaphang ki jingjop jong ka ri ha ki kam kiba iadei bad ka Aatmanirbhar Bharat lyngba ki prokram ba kyrpang.
Ia ka prokram ban pynkup burom ia kine ki nongniah thuk thuk la pynlong da ka HQ Research and Development Establishment (BRO). Ha ka jingkren jong u ha kane ka rynsan, u Sunil Kumar Choubey, SE (Civ), Officiating Chief Engineer HQ R & D Estt (BRO) u la kren shaphang ki jingai jingshakri ka BRO ban pyniasoh ia ki jaka, ki briew jong ka ri bad jong ka Meghalaya.
U la kyntu ruh ia ki samla na ka jylla ba kin noh synniang sha ka jingtei ia ka ri kaba khlain. U Major General D.K Singh, SM, Officiating Director General, Assam Rifles un pyllait ia kane ka kynhun na Shillong ka ban mih nangne sha Hasimara, Alipurduar bad Kolkata lashai ka sngi.
