Shillo
ng, Nailur 07: U Dr D R L Nonglait president jong ka Khasi Author Society (KAS) mynta ka sngi u la pynlait paidbah ia ka kot kaba la ai kyrteng “Shaei Ngan Phai?” kaba la thoh da u Dr BPS Toi.
Ha ka jingkren jong u Dr Nonglait, u la ong ba ka jaid bynriew ka don kam ia shibun ki kot, ka jaka kaba duna eh mynta kaba ym pat da don kiba thoh ka dei halor ki jingthoh sha phang ka saian. U kyntu ia ki heh pulit, ki IAS ophisar, kimuktiar bad kiwei kiwei ki heh sorkar ba kin wan sha khmat ban thoh kot.
U la ong ha ki por ba la leit noh ki don ki heh sorkar kiba la thoh ia ki kot, kum u SJ Dunkan, u bah RT Rymbai, kan long kaba bha lada ki briew kiba don ha ka bor kin thoh ia ki kot ia kaei kaba ki sngewthuh bad kan long ka jingmyntoi ia ka jaidbynriew ha ka thoh ka tar.
Haba phai sha u Dr BPS Toi, u dei u doktor briew bad u la leh ia kaba dei eh ban thoh kot bad kane ka long shisha ka jingnoh syniang kaba khraw sha ka thiar ka thoh ka tar jong ka jaidbynriew. Kane ka kot ka long kaba itynnad namar u nongthoh u la thoh ia ka kumba ka long.
Halor kane ka kot ia ka jingkren lyngkot la kren da u Professor SS Majaw bad ha ka jingbatai jong u ka long ba kane ka kot ka khampher na kiwei ki kot namar kane ka kot lah ban buh ia ka ha ki ar bynta, ka nobel ialap lane ka nobel jingsngew namar ha kane ka kot ka don bun ki symboh pyrkhat.
Kane ka kot ka don 308 sla bad ia la phah ha ki ar lynnong ka bynta kaba nyngkong ka don 33 lynnong bad ka bynta kaba ar ka don 5 lynnong. Ia kane ka kot la pynlait mynta ka sngi ha ka jingialang kaba la long ha iing dorbar jong ka shnong Mawkhar.
