Shillong, Naitung 01: Ha kane ka sngi rakhe ia ka jingdap 18th snem jong ka sngi iap jong u Captain Keishing Clifford Nongrum, na ka liang jong ka Raj Bhavan, Shillong kala pynlong bun ki programme mynta ka sngi ha kaba u Lat jong ka jylla u Banwarilal Purohit u la khaweh ia ka lama na ka bynta kane ka jingiamareh.
Ka jingiamareh la sdang na Madan Iewrynhep Laitumkhrah bad la pynkut ha Madan Polo, ha dien kata la pynkut ia kane ka jingkynmaw burom da kaba pynlong ia ka jingai snam ei ha ka kyrtengjong u Captain Keishing Clifford Nongrum Memorial Day Function ha Raj Bhavan, Shillong.
Ha kane ka sngi la pyni paidbah ruh ia ka phlim kaba la ai kyrteng “At the feet of Motherland: Life of Captain Clifford Nongrum” ha kane ka sngi la pynkup burom ia ki kmie ki kpa bad la sam ruh ia ki khusnam sha ki nongjop ha kane ka jingiamareh bad kiwei kiwei ki jingiakop ia kiba la pynlong ha u bnai Jylliew ia ki khusnam la sam da u Lat jong ka jylla.
Kiwei kiba la ia don lang ha kane ka sngi ki long u Y. Tsering Chief Secretary jong ka jylla u Col.(Retd) Virendra Singh Bhalotia, Lt. Gen. Satish Dua, Chief of Integrated Defence Staff jong u Chairman, COSC bad u Colonel jong ka J.K. Light Infantry Regiment, Defence personnel lem bad kiwei kiwei ki heh jong ka sorkar jylla.
