Shillong, Iaiong 15: Mynta ka sngi ha ka por step ka eriong kala wan kynsan kynsan hapoh ka sor Nongstoin jong ka West Khasi Hill District bad ha kane ka jingjia palat spah tylli ki iing kila julor bad ki dieng kila kdiah.
Ha kane ka jingjia jong ka jinglynshop jong ka Mariang kam shym don kano kano ka jingia kaba sngewsih ha kaba ia dei bad ka jingim birew. Kane ka eriong haduh ba thoh ia kane ka khubor kala ktah ia ka sor Nongstoin bad ki shnong ba mar jan.
Na ka liang jong u Deputy Commissioner jong ka West Khasi Hills District u Bah T Lyngwa haba kren ha u SP News Agency u la iathuh ba kane ka jingjia kala jia mynta ka sngi ha ka por hapdeng 6.00 baje mynstep bad 6.30 baje mynstep.
La iathuh ba haduh mynta ka ophis kam shym la ioh kano kano ka jingjtip ban don kano kano ka jingmynsaw ia ki briew, la iathuh ba katkum ka jingkhein kaba la ioh ki iing kiba la shah pynjulor ha kane ka jinglynshop ka mariang ki long 115 tylli bad ki shnong kiba la shah ktah ki long 18 tylli.
Na ka liang jong u Deputy Commissioner jong ka West Khasi Hills u la iathuh ba ka jingiarap ia ki lanot ha kane ka jingshah pynjulor ha ka mariang kan sdang la shai ka sngi bad ka dor kan long katkum kaba la buh da ka sorkar.
